Home Parlamento Iniciativa di ley pa mehora salario minimo pa esnan cu ta traha...

Iniciativa di ley pa mehora salario minimo pa esnan cu ta traha mas cu 40 ora pa siman

128
0
SHARE
- Advertisement -

Shailiny Tromp ta bin cu:

*introduccion di salario minimo hubenil

ORANJESTAD(AAN):  Parlamentario di fraccion di MEP Shailiny Tromp-Lee tin un iniciativa di ley cu pronto e kier cuminza cune.

Ta trata di un ley riba salario minimo.

Durante e conferencia di prensa di fraccion di MEP di tur Dialuna, e parlamentario a trece dilanti cu dia 28 di Januari el a sinta cu Minister di Labor y el a cuminza cu un ronda consultativo, unda cu el a sinta cu e director y un hurista di Departamento di Labor.

Banda di esaki el a sinta cu e Secretario General y e ‘Beleidsadviseur’ di Sociaal Economische Raad (SER), como tambe e vice presidente di FTA.

Tromp su intencion ta pa atende cu diferente aspecto di salario minimo.

E parlamentario a remarca cu apesar cu e cantidad di ora cu hendenan ta traha pa siman ta varia di 40 pa 48 ora pa siman, esnan cu ta cobra salario minimo ta haya e mesun suma, cu ta 1.711 florin y 15 cent.

Pa siman esaki ta 399 florin y 10 cent.

“Mirando cu e Gobierno aki ta bisa cu e ta pone e ser humano central, mi ta kere cu riba e tereno aki mester bin un reparticion mas husto”.

“Na Corsow por ehempel esnan cu ta traha 40 ora pa siman y tin un salario minimo, ta cobra 1.622 florin y 8 cent pa luna, mientras cu si bo ta traha 45 ora pa siman e salario ta bira 1.825 florin y 64 cent”.

“Si bo ta traha 48 ora pa siman bo ta cobra un salario minimo di 1.947 florin y 46 cent”.

Esaki segun Tromp, kende a sigui bisa cu eynan bo ta wak e diferencia, compara cu Aruba unda cu tin solamente 1 salario minimo.

“Esey ta e prome cambio cu ami lo kier propone y te cu awor e bishitanan cu mi a hasi, tur ta sostene e idea”.

“Nos a dialoga hopi riba e punto aki”.

“Otro parti cu mi ta pensando riba dje ta pa introduci un salario minimo hubenil”.

Esaki segun e parlamentario di MEP, kende a sigui bisa cu na e momentonan aki nos no ta duna proteccion na e hobennan cu subi e mercado laboral.

“Si bo wak Hulanda y Corsow, ambos conoce un salario minimo hubenil (Jeugd Minimumloon)”.

“Mi ta kere cu a bira ora pa nos na Aruba garantiza un pago husto na tur e hobennan cu ta traha”.

“Despues di a sinta cu Departamento di Labor, a dicidi cu e mihor manera ta pa hasi esaki di 15 aña  bay dilanti”.

“Esey ta un edad cu na ningun otro manera tin proteccion”, segun Tromp, kende ainda ta evaluando na ki manera  por introduci e salario minimo hubenil aki.

El a indica cu e ta bay tuma contacto cu Corsow pa haya mas informacion riba con nan ta hasi esaki.

Otro parti di e salario minimo cu Tromp kier trata, ta basa riba articulo 13 di e ley, cu ta prescribi na ki manera ta aumenta e salario minimo anualmente.

“Ami kier hasi esaki mas flexible y no strak manera cu e ta aworaki”.

Esaki segun Tromp, kende a sigui bisa cu e ta papiando cu tur stakeholder, pa wak kico ta e mihor manera pa atende cu esaki.

 

 

- Advertisement -

DUNA COMENTARIO

Please enter your comment!
Please enter your name here