Home General Mal maneho a pone trahadornan di Centro Colorado bay den protesta

Mal maneho a pone trahadornan di Centro Colorado bay den protesta

106
0
SHARE
- Advertisement -

Trahadornan ta reclama atencion di minister

ORANJESTAD (AAN):  Dialuna mainta tabata tin un protesta di parti di e trahadornan di Centro Colorado. E motibo di e walk-out tabata cu e trahadornan ta den un incertidumbre pa 9 aña largo caba.

Segun Jasmine Angela- Croes, shopsteward di e trahadornan, esaki tin di haber cu e echo cu no tin atencion y no tin nada di seriedad pa cu e situacion di e trahadornan  cu ta sclamando pa añanan.

E preocupacion number un ta e mal maneho. “E departamento aki ta un barco tira riba lama, sin capitan sin matros sin nada. Dus, nan ta sin rumbo. No tin ningun hende pa para pa responsabilidad”, el a bisa.

Trahadornan ta trahando sin seguridad. “Cada cliente cu bo tin bo mester tin cierto cantidad di trahador pa cada warda. Ta papia di añanan caba cu deficit di personal. Nin un hende no ta haci nada y e opnamenan ta sigui tuma lugar, Angela – Croes a indica.

Aworaki ta Centro Colorado tin 20 cliente interna di cual ta traha un warda di 11 pa 7 sin mira unda nan ta situa, esta Centro Colorado. Un lugar aleha unda te hasta e ileganan ta drenta y tin un hende trahando warda di 11 pm pa 7 am y mayoria biaha ta hende muher su so.

Tin un promedio di 8 cliente cu ta “double trouble”, kiermen cu tin un problema sikiatrico fuera di e problema di adiccion.

Jasmine Angela – Croes  a duna di conoce cu por ehempel, siman pasa un trahador femenino na warda mester a keda cera den un kamber na lock pasobra e tabata bao menaza di un pashent cu problema sikiatrico.

Un or di madruga, cu e no por a deal mas cu e situacion, el a yama, manda mensahe pa waarnemend y te cu awor e waarnemend no a contest’e, a agrega.

Cosnan ta sosode eyden y ora ya tuma contacto cu leiding, Steve Gibbs, a bisa, cu ta director interino “ta contesta nan pa nan no yame pa nada pasobra nan ta hendenan cu tin añas di experiencia di trabao, anto wak con nan ta regla nan asunto di trabao. Esey ta e contesta di un director interino den direccion di un trahador”,  Angela-Croes a agrega.

Ora e trahador yega trabao, e ta un isla riba su mes. No tin structura, no tin material y e leiding no ta tuma nan responsabilidad.

 

CONTACTO CU MINISTER

 

A tene contacto cu e minister encarga, pero e no ta tuma e decision cu ta den su man, a manifesta. Por sinta cu cualkier organizacion, pero e minister tin e palabra final.

Minister a duna un afspraak pa dia 30 di Januari, 2’or na Centro Colorado pa e bin scucha tur e preocupacionnan su mes for di boca di e trahadornan.

No ta e caso cu ta SEPPA ta sinta instiga, Jasmine Angela-Croes a manifesta.

Diaranzon 30 di Januari, 1:47 pm a ricibi for di Directie cu Bureau di Minister a yama pa cancela e reunion. “Pa cuminza, minister no tabata tin afspraak cu directie. E tabata tin afspraak cu SEPPA, cu personal. E no a yama SEPPA, e no a manda un email y e no a informa SEPPA ningun momento cu e ta cancela e reunion.

Tog ta duna e minister beneficio di duda ya cu cosnan urgente por pasa. Sinembargo, el a keda cu diahuebs e lo a duna fecha nobo, pero ayera dialuna mainta ainda no a ricibi ni fecha ni orario, ni yamada ni email di bureau di minister.

Ta pesey e trahadornan a dicidi cu ta basta. Nan kier atencion di minister, e atencion cu nan merece, e shopsteward di SEPPA a remarca.

Durante dos ora e trahadornan a manifesta den spera cu minister lo por a duna nan atencion. Nan a bisa cu si esaki no sosode e ora e accion lo wordo intensifica.

 

 

- Advertisement -

DUNA COMENTARIO

Please enter your comment!
Please enter your name here