ORANJESTAD (AAN): Diabierna mainta na corte huez a duna su veredicto den famoso caso ‘Ibis’, den cual 23 persona a wordo acusa di entre otro soborno, labamento di placa y estafa.
E sospechoso principal den e caso aki ta ex minister Paul Croes.
Como cu tabata tin 23 sospechoso, a tarda bastante prome cu huez tabata cla cu tur e veredictonan, mirando tambe cu 1 pa un e huez mester menciona e acusacionnan y bisa si e ta haya e sospechoso culpable of no.
Mr. Chris Lejuez a representa varios di e acusadonan y ora cu el a Sali for di corte prensa a papia cune.
El a indica cu di e 23 sospechosonan 5 a wordo declara liber di tur acusacion, 9 a haya un multa, 4 a wordo condena pa hasi trabao comunitario, mientras cu 5 a haya castigo di prison.
Di e 5 personanan cu a haya castigo di prison, mayoria a sinta caba e castigo cu nan a haya, ora cu nan tabata den detencion preventivo.
Pa loke ta e castigo di Paul Croes cu ta 4 aña incondicional, Lejuez a bisa cu el a kere cu e ex mandatario lo a haya menos castigo.
Croes a haya como castigo tambe cu durante 9 aña e no por ocupa ningun puesto den Gobierno of di ambtenaar, cu ta e maximo cantidad di aña cu un persona por haya.
Lejuez a splica cu fiscal a pidi pa detene Croes mesora despues di e veredicto, pero huez no a bay di acuerdo cu esaki, mirando cu ainda Croes por apela.
Prensa a puntra Lejuez si tin algun di su clientenan cu lo bay apela, pero como cu e no a lesa e sentencianan ainda por completo, e no por contesta esey cu seguridad.
El a indica si cu mayoria di su clientenan ta satisfecho cu nan sentencia.
Mayoria a haya un multa y nan a bisa cu nan lo paga e multa pa keda cla cu e asunto aki.
“Tin cu ta bisami cu nan tin cu pensa ainda si”, segun e abogado, kende a indica cu e motibo pa cual nan kier pensa ta cu nan kier wak si nan por evita di haya un carchi di castigo(strafkaart).
Si nan acepta y paga e multa, nan ta haya un strafkaart.
