Home Gobierno Minister Otmar Oduber a anuncia desaroyo di hotel na San Nicolas

Minister Otmar Oduber a anuncia desaroyo di hotel na San Nicolas

226
0
SHARE
- Advertisement -

ORANJESTAD (AAN) – Den conferencia di prensa di Gobierno, Dialuna, Minister Otmar Oduber, titular di Infrastructura, Medio Ambiente y Desaroyo Teritorial, a elabora tocante un proceso cu ta andando pa loke ta trata e desaroyo pa San Nicolas, cual ta inclui construccion di un hotel.

Na varios ocasion e dignatario a enfoca riba e hecho cu Gobierno ta sigui pusha pa por crea un desaroyo berdadero pa San Nicolas.

“Como Minister encarga pa siete aña y mey cu nos turismo, consehero di turismo y como un persona cu a sostene turismo den transcurso di añanan den Parlamento, a sigui cu e empeño aki. A anuncia na diferente ocasion den medionan di comunicacion y encuentronan cu comunidad cu nos ta kere den desaroyo turistico hotelero pa e area di San Nicolas. Particularmente mirando e discusion cu tin continuamente di cu of ta crea e negoshi pa trece cliente, of ta trece cliente pa crea e negoshi” Minister Otmar Oduber a expresa.

Situacion di San Nicolas:

Mas cu 40 aña a mira cu si no ta pa e refineria e ta dificil pa hiba y mantene negoshi na San Nicolas y comerciantenan no ta inverti si no tin hende pa cumpra.

“Di otro banda dificil hende ta haci compras na San Nicolas pa motibo di falta di negoshi adecua. Considerando e situacion aki a yega na e conclusion cu mester por bin un desaroyo cu por para riba su mes. Varios Gobierno den pasado, a bisa cu ta para pa un desaroyo di industria turistico na San Nicolas (hinca den nos plan di Ruimtelijke Ontwikkelingsplan (ROP) 2009). Den e ROP nobo a haci algun cambio, minimizando e area indica como desaroyo turistico, y converti e area restante como un area di naturaleza. Ta trata di mas o menos 70% – 80% di tereno converti den ‘natuur-gebied’ cual ta significa cu no lo por tin desaroyo den e area aki mas”, e dignatario a indica.

Ademas, e mandatario a splica cu tin un area unda cu pa mas cu diez aña caba tin siete pa ocho parcela pa desaroyo turistico, conforme ROP bieu y nobo. Di e terenonan aki cinco di nan a wordo compromete sea via di un opcion of ‘overeenkomst’ door di Gobierno anterior na un cantidad di 2100 camber (parti di e 7000 cambernan menciona den pasado). Gobierno actual a combersa cu e diferente gruponan aki pa mira e capacidad financiero pa nan realiza un proyecto na San Nicolas.

A base di e combersacionnan aki a realiza cu esnan cu por tabata limita y e ‘overeenkomsten’ no tabata cuadra cu e opcionnan duna tampoco. Consecuentemente a duna e personanan un periodo pa por cumpli cu nan ‘overeenkomst’. Pa cual despues di e proceso aki a logra pa limita esaki na un solo proyecto. Anteriormente a asigna como esun di Bahia Principe cu durante di e ultimo periodo di Gobierno anterior tabatin un overeenkomst pa un hotel di 950 camber all inclusive.

A sinta na mesa y negocia y a bisa cu ta dispuesto pa duna un propiedad di hotel “all inclusive” pa locual cu ta necesario pa e ta exitoso na San Nicolas, mirando e situacion cu no tin un desaroyo pa depende riba dje. Importante pa menciona cu e posibilidad di hotel “all inclusive” na San Nicolas tambe ta hinca den e ley  di all – inclusive. Ilustrando e continuidad cu tin den henter e maneho pa desaroya e area.

‘Ripple effect’

Minister Oduber a splica cu e desaroyo turistico hotelero aki lo tin “ripple effect” pa e area. Automaticamente ora cu tin hotel mester di car rentals, tour operators, watersports, souvenir shops, restaurants y mas! Mayoria di locual cu no tin actualemente.

Analizando e situacion y recomendacionnan a scoge na lugar di 950 camber “all inclusive”, e cantidad cu ta necesario pa hacie factible, cual ta 600 camber. Esaki ta hacie un negoshi sigur y e ta fit dentro di e maneho di ROP bieu y nobo. E punto di salida ta cu “all inclusive” ta bin pa pusha e economia na San Nicolas pero despues di esey den e fase 2, lo mester bay den e tipo di hotelnan European Plan (EP) cu no ta tur cos inclui.

Pa conclui Minister Oduber a splica cu e proceso actualmente ta den e fase cu e inversionistanan interesa mester cumpli cu e condicionnan.

A mustra cu e ta un prioridad pa Gobierno y e maneho cu tin pa e area pariba di nos isla. Tambe cu kier pa e desaroyo aki tuma luga manteniendo tur e reglanan cu Ministerio a pone pa salvaguardia nos medio ambiente, su flora y fauna.

- Advertisement -

DUNA COMENTARIO

Please enter your comment!
Please enter your name here