Home General Nacionnan Uni mester haci cambio esencial den Plan 2030

Nacionnan Uni mester haci cambio esencial den Plan 2030

44
0
SHARE
- Advertisement -

Venezuela a duna e prueba cu prome prioridad ta bon gobernacion

*E calidad di liderazgo ta determina factibilidad di e plan pa desaroyo

*E lidernan cu Nacionnan Uni no kier opone ta destrui e plan

ORANJESTAD (AAN):  Na final di 2018, Algemene Rekenkamer Aruba a tene un encuentro cu pueblo di Aruba pa presenta su relato riba e Plan pa Desaroyo Sostenibel di Nacionnan Uni, cu na 2030 mester a resulta den cambionan grandi pa poblacion mundial. Derecho di hende como e punto central mester ser garantisa pa por logra e 17 puntonan cu ta e base pa e miho mundo proyecta.

Aruba tambe ta parti di e tratado y e programa di Gobierno di Aruba ta basa riba e hende cu tur e angulonan cu Nacionnan Uni ta trece dilanti. DIARIO a papia cu personanan riba diferente tereno di e plan cu ta ser aplaudi. Pero tur hende tin nan reserva tambe con e ehecucion lo ta na nivel mundial y hasta tin temor cu atrobe paisnan cu ya conoce democracia lo carga e proceso, cu Venezuela a demostra cu ta depende di e lidernan di e pais.

E plan di Nacionnan Uni ta exigi un participacion di tur hende. Gobierno mester percura pa desaroyo di e plan y mester uni e diferente gruponan cu ta representa gobernacion y comunidad.

E 17 puntonan ta mustra cu mester caba cu hamber, mester tin educacion pa tur hende, cu mester haya posibilidad pa desaroya, mester cuida naturaleza entre otro.

E plan ta ser considera idealista dor di varios persona cu a discuti e documentonan cu DIARIO. Tur hende kier pa mundo cambia pa miho y pa problemanan social disparce. Tin regla pa e desaroyo aki tuma luga.

E ta exigi tambe placa di e paisnan cu mester inverti den e proceso pero tambe cambionan cu mester tuma luga y inversionnan importante cu mester bira parti di e gastonan di e pais.

Manera DIARIO a mustra den pasado recien, mester di un bon control cu ta exigi pa e gobierno tambe permiti su mes ser controla y ta adapta su maneho na guia di institutonan independiente.

A mustra DIARIO riba e hecho cu Algemene Rekenkamer Aruba ta considera cu e tin un tarea importante como controlado di cuentanan di Aruba den realisacion di e plan, cu segun expertonan cu DIARIO a confronta cu e plan mester haya mas forsa dor di tene mas na e realidad.

Na e momentonan aki Venezuela ta pa region di Caribe y Latino America e otro banda di e medaya cu e plan di Nacionnan Uni kier alcansa. E gobernacion cu a ser hiba na Venezuela tabata dirigi riba un maneho cu ta opone e plan di desaroyo di Nacionnan Uni completamente.

E punto mas importante pa por realisa e plan, ta e punto cu Algemene Rekenkamer a trece dilanti cu ta punto 16 y cu ta bisa cu lidernan di e pais mester ta eligi den eleccionnan liber. Paisnan mester di pais, husticia y institucionnan fuerte.

Segun expertonan pa e plan 2030 funciona, Nacionnan Uni mester tuma un posicion mas fuerte den e foro internacional cu ta dicidi riba bon of mal gobernacion y legitimidad di lidernan a base di e forma u nan a ser eligi.

Venezuela ta un ehempel di un pais cu pa motibo di su lidernan no a conoce crecemento pero a bay atras.

E punto mas importante pa Nacionnan Uni controla ta, e calidad di gobernacion di paisnan y mester tin un instituto special pa dicidi si e paisnan por cumpli cu e exigencianan di e plan.

Ta existi un miedo hopi realistico, cu atrobe un grupo di pais ta tene na e tratado mientras otro grupo ta haci y deshaci .

Segun expertonan e ta un bon plan y Aruba lo beneficia si e ta ehecuta manera acorda pero e tin un punto cu ta Nacionnan Uni mester vigila y esey ta e control riba calidad di Gobierno. Si un Gobierno no ta capaz pa cumpli cu e puntonan di 2030, mester denuncia esaki mundialmente .

Nacionnan Uni a base di e plan 2030 sigur no por hala atras sin tuma un posicion manera a sosode na Venezuela, cu a trapa riba tur loke meta di e plan ta bisa cu introduccion di miseria y caida social di miembronan di comunidad.

E plan 2030 sigur ta duna Nacionnan Uni base pa spierta e pais concerni cu e no ta tene su mes na e tratadonan y denuncia ora reglanan di democracia ta ser pisotea.

DIARIO ta sigui traha riba documentonan oficial pa mira tambe con desaroyonan ta.

- Advertisement -

DUNA COMENTARIO

Please enter your comment!
Please enter your name here