Home Hudicial O.M. kier pa Hues duna e burdugo Jairo Chalgut mas cu 20...

O.M. kier pa Hues duna e burdugo Jairo Chalgut mas cu 20 aña di castigo

2836
0
SHARE
- Advertisement -

ORANJESTAD (AAN): Diamars  mainta Jairo Chalgut a presenta den Corte pa e apelacion di Ministerio Publico contra su condena di 20 aña di prison. Hof a bisa Chalgut cu Ministerio Publico a apela contra e sentencia y pesey e caso ta bin dilanti.

Diamars sinembargo e tratamento no a tuma lugar. Esey pasobra cu e caso tabata pro forma. Riba dje, abogado di Chalgut mr. Illes ta malo.

   CASO POSPONI PA JUNI 2019:

Procurador General a bisa cu e acusacion contra Chalgut ta cu dia 3 di November 2017, el a mata Sarahi (19). Hof a bisa cu e motibo cu e caso tabata pro forma tabata pa sa si di parti di Chalgut of Ministerio Publico lo kier haci cierto investigacion.

E president di Hof a bisa cu el a compronde cu tanto di parti di abogado como Procurador General cu no ta desea pa haci mas investigacion.

Hof a pensa un rato y a fiha 4 Juni 2019 pa tratamento di e caso.

    HUES NO A DUNA CASTIGO BIDA LARGO:

Ta asina cu Fiscal den Corte den Promer Instancia a exigi bida largo pa Chalgut. Dia 28 September 2018 Hues ta mustra cu for di e pruebanan por compronde cu Sarahi riba 3 November 2017 entre mas o menos 7.40’or di mainta te cu 10’or di mainta, a worde mara den su propio cas, viola y mata.

El a worde mara na su pols y enkel cu un tape transparente, un waya di coriente bruin y un veter preto. Su boca a worde getape cu un tape transparente. E tape aki a worde pasa mas cu 10 biaha rond di e cabez, boca y nek di e victima. A pone un saco di plastic over di e victima su cabez y na su nek e saco a worde mara sera. Sarahi a worde hinca cu un cuchiu na su nek y a worde bati cu forza na su cabez y cara. Sarahi a worde viola y a fayece door di stik of choca.

A haya muestranan di DNA riba e saco di plastic cu tabatin over di e cabez di Sarahi. E muestra tabata na konopi cu a mara na altura di e nek pa sera e saco. A haya tambe muestra di DNA riba e waya di coriente bruin, e veter preto cu a usa pa mara Sarahi na su pols y enkel. A haya muestra di DNA riba un pida tape transparente. Tambe a haya muestra di DNA riba un pida huña cu tabata bou di curpa di Sarahi.

Ademas a haya muestra di DNA na e huñanan di man robez di Sarahi esta su duim, su dede di mustra, su dede mey mey y su dede di renchi. Ariba curpa di Sarahi a haya sperma for di cual a haya DNA.

    DNA TA DI E SOSPECHOSO:

Corte di Husticia ta di opinion cu e muestranan di DNA cu a haya na e cas, ta muestranan di esun cu a mata Sarahi. A base di e raport di expertonan di Instituto Forence Hulandes (NFI), Corte ta conclui cu e muestranan di DNA cu a haya, ta di Chalgut.

    NO KERE STORIA DI SOSPECHOSO:

Na opinion di Corte, Chalgut no a duna un splicacion aceptabel y creibel pa cu e muestranan di DNA cu a haya di dje na e lugar di e lamentable incidente. Corte a pone un banda e declaracion di Chalgut, kende a bisa cu e tabatin relacion sexual cu Sarahi. Corte, totalmente no ta kere e declaracion aki ya cu no por haya nada cu ta cuadra cu loke Chalgut ta bisa. Ademas e declaracion aki ta contrario na e otro declaracion cu anterior Chalgut a duna caminda el a bisa cu e ultimo biaha cu e tabata den e cas di e victima tabata mas o menos 1 luna promer cu e morto di Sarahi.

For di declaracion di e mama, ruman muher chikito, amigo di Sarahi y e coach di Sarahi ta mustra cu e sospechoso, algun siman promer cu e morto di Sarahi, tabata den e cas y cu Sarahi no kier tende nada di Chalgut y cu nan no tabatin contacto cu otro. Cu e sospechoso ta e culpable por saca for di e declaracion di e bisiña di Sarahi y un conoci di e sospechoso. E bisiña a declara cu 3 November 2017, mas o menos 7.20 di mainta el a mira un homber den cura di Sarahi para. E bisiña ta kere cu e homber ta e sospechoso Chalgut.

   DNA SO NO TA SUFICIENTE:

Hues di Corte di Husticia a mustra cu a base di e pruebanan di NFI por conclui cu Chalgut tabata esun cu a mara Sarahi den su cas y keda cun’e den e cas, viol’e y mat’e.

Hues a mustra cu pa por prueba e promer acusacion esta cu Chalgut a mata intencional y e acusacion subsidiario esta cu Chalgut a viola e victima cu consecuencia cu el a muri, mester por demostra kico tabata e intencion di Chalgut, e relacion entre e delitonan y con esakinan a worde haci. Hues ta haya cu no tin claridad den esaki.

No por bisa pakico Chalgut a haci e cosnan aki y kico exactamente a sosode den e cas. Esaki pasobra Chalgut ta desmenti y ta solamente tin e pruebanan DNA. Por pensa otro scenarionan pero e hecho cu Chalgut ta desmenti ta haci cu no por bay scoge di un of otro scenario cu por pensa. Pa esaki mester tin prueba legal y convincente.

Por pensa cu e sospechoso a mata e victima cu e intension pa logra di secuestr’e, viol’e manera e promer acusacion ta bisa pero no por prueba esaki legal y convicente. Hues a bisa cu Corte no sa kico tabata e intension di e sospechoso y tampoco no sa con e delitonan a sosode.

E otro pensamento cu e sospechoso a haci maltrato pa asina logra viola e victima cu consecuencia cu e victima a fayece, manera e acusacion subsidiario ta mustra, no por prueba esaki legal y convicente.

    POR PROBA CU A VIOLA Y MATA:

Hues a sigui bisa cu for di e pruebanan cu tin por prueba legal y convicente cu Chalgut a secuestra Sarahi, a viola e victima y cu a mata e victima. Esaki manera e acusacion mas subsidiario ta mustra.

Segun articulo 1:136 di Codigo Penal, por duna un castigo maximo pa e delito aki di 20 aña di prison.

    MOTIBO PA DUNA E CASTIGO:

Hues di Corte di Husticia a splica pa dicidi riba e cantidad di castigo, Corte a tene na cuenta cu e sospechoso a mara un mama hoben den su propio cas, a viol’e y na un forma hopi hororoso a kita su bida. Chalgut a laga Sarahi sin bida den e cas sabiendo cu Sarahi su hendenan lo bin hay’e.

Den e caso aki ta e ruman muher chikito di 13 aña a haya Sarahi morto den e cas. For di e heridanan na Sarahi su pols y enkel ta mustra cu el a lucha pa su bida. Corte ta haya cu e derecho mas fundamental cu un hende tin, a worde kita for di Sarahi.

A causa un daño irreparable cerca e familiarnan, en especial e yiu homber chikito di Sarahi, su mayornan, su rumannan muher y su partner. E incidente aki a conmove henter comunidad y a causa sentido di inseguridad den e comunidad Arubano. Corte ta tene na cuenta e conclusion di psychiater cu Chalgut ta responsabel pa su actonan y cu e chens pa algo asina ripiti ta mediano pa halto. Corte ta tene na cuenta e carchi di castigo di Chalgut caminda el a yega di worde condena pa un atraco.

   20 AÑA DI PRISON:

Hues di Corte di Husticia a bisa cu e seriedad di e hechonan, e impacto grandi cu esaki a causa pa e familiarnan y comunidad, e chens grandi cu e lo por bolbe haci algo asina, e punto di bista cu mester haci husticia y cuida comuidad, ta hustifica un castigo di prison pa un tempo largo.

Corte no ta haya legalmente y convicente proba e promer y di dos acusacion y ta declara Chalgut liber di esakinan. Corte ta haya legalmente y convicente prueba e acusacion di secuestra, viola y mata y ta condena Chalgut na 20 aña di prison, kitando e tempo cu e ta sera caba den KIA.

Cu e apelacion di Ministerio Publico, ta mustra cu Ministerio Publico kier pa Chalgut haya e exigencia di bida largo. Na Juni 2019 ora di tratamento di e caso lo bay mira kico tur lo bin dilanti.

- Advertisement -

DUNA COMENTARIO

Please enter your comment!
Please enter your name here