Home Hudicial Paul Croes condena na 4 aña di prison y 9 aña no...

Paul Croes condena na 4 aña di prison y 9 aña no por postula como politico

876
0
SHARE
- Advertisement -

ORANJESTAD (AAN): Diabierna mainta durante practicamente 3 ora largo, Hues a dedica pa lesa e sentencia di tur e 23 sospechosonan den e caso penal IBIS caminda e sospechoso principal ta Paul Croes. Ta asina cu pa tanto e señora di Paul Croes, Melony, como Paul Croes, Hues a reduce e castigo exigi pa Fiscal. Sinembargo e condena di 4 aña di prison a laga Paul Croes hopi sorprendi. Por spera cu lo apela e sentencia.

    CASTIGO COMBINA PA MELONY:

Hues ta haya Melony Croes Paesch no culpable pa un parti di labamento di placa y a declar’e liber. Pa loke e otro acusacion di labamento di placa cu Paul, declara liber. Melony no tabata sa di placanan cu Paul Croes a haya. Hues ta haya cu door cu Paul Croes tabata haci gastonan priva, con Melony por sa cu esaki lo tabata procedente di delitonan. Hues ta haya Melony a laba placa den su negoshi. Tin un cantidad di placa cu no por describi e prosedencia di esakinan mas cu 209 mil Florin.

Hues ta haya Melony complice di tuma trahador ilegal den servicio. Paul a laga e dama Venezolano drenta Aruba door di Vingal. E dama tabata traha sin permiso di trabao cerca nan y tabata haya pago. Hecho ta cu e dama tabata na Aruba como turista y tabata traha y pesey considera como traha ilegal. Pa cu e castigo, Hues a bisa cu e ta tene cuenta cu ta dificil pa haya hende adecua pa cuida yiunan. Normal pa esaki mester duna un multa. Di otro banda Melony como casa di minister mester duna ehempel. Ta evidente cu e famia a sufri pa e caso. Sinembargo Hues no lo tuma esaki den castigo pasobra Hues ta haya cu esaki ta normal cu como ex minister lo haya esaki. Hues a bisa cu e lo desvia di e exgencia di Fiscal na beneficio di Melony. Hues a condena Melony na 120 ora di trabao pa comunidad of 60 dia sera. Tambe Hues a condena Melony na 3 luna di prison condicional cu 3 aña di prueba.

    PAUL CROES CULPABEL DI CORUPCION:

Hues a bisa cu un ambtenaar mester ta hopi cuidadoso pa pidi regalo. Asina ripara cu un empresario ta haci donacion na stichting. E promer grupo ta empresarionan a haci donacion na stichting di Paul Croes.

Paul Croes a pidi nan haci donacion pa cumpra carchinan di concierto pa campaña pa eleccion. Paul Croes tabata sa cu door di pidi donacion ta pone empresarionan den un posicion. E mayoria door di a pidi dispensacion di permiso, a haci donacion.

E di dos grupo ta esnan cu a duna cosnan na Paul Croes manera e Chinesnan. E di tres grupo ta e caso Bashaca cu a laga Paul Croes haya masha hopi placa pa permisonan. E declaracion di Schwengle y Feliciana ta detaya caminda nan ta mustra cu nan tabata prepara permisonan y Paul Croes tabata firma y tabata haya placa. Hues ta haya legalmente proba e promer acusacion cu Paul a laga su mes worde cumpra. Mustra cu e hecho cu diferente empresario a worde declara liber no kiermen cu esey ta conta pa Paul Croes.

Hues a rechaza defensa di abogadonan riba fishing expedition. No ta haya manera abogadonan bisa cu a haya documentonan laat. Tambe no haya cu Ministerio Publico den introduccion di e caso den Corte a hinca Paul den posicion desventahoso. Hues a bisa cu e ta reconoce e hecho cu Ministerio Publico a duna hopi publicidad riba caso pero no ta haya cu Ministerio Publico no cauteloso y viola norma. El a rechaza e ponencia pa declara Ministerio Publico no admisibel.

Hues ta haya Paul Croes complice di labamento di placa. El a bisa cu pa un parti e ta declara Paul Croes liber. Esey ta relaciona cu e parti cu a declara Melony liber.

MAL USO PODER:

Hues ta haya cu Paul Croes a abusa di su poder. El a menciona e caso di Restaurant 297, caminda Paul a yama pa para control. Kock a bay haci control y Paul Croes a pidi Kock pa no controla si Paul ta den un restaurant. Na December 2016, Paul Croes tabata na Miami y a instrui Trimon pa bisa Kock no bay controla e restaurant 297 y no bisa Kock cu e ta na Miami. Hues ta haya cu aki e interes di drecha imagen di Paul, no tin validez. Hues a remarca cu ta parce cu Paul Croes tin un interes special cu doño di Restaurant 297 y a actua contra ley door di instrui pa no laga controla e restaurant. Aki el a haci mal uso di su funcion como minister di labor.

**E caso di Supermercado Harmony, durante control Oduber a constata irregular y e Chines ta yama Paul y Paul ta instrui Oduber pa stop control.

**Trahador ilegal. A yama Vingal di Immigracion pa percura cu e dama pasa, aunke cu e no tin garantia pa drenta. Haya cu Paul Croes a abusa di su funcion pa Vingal evita cu e dama drenta.

**Doño di restaurant a pidi pa un tereno y riba peticion di Paul a ofrece 1 caha di cerbez so. Paul a instrui pa bisa e doño cu e lo no haya tereno si e no duna mas cahannan di cerbez.

** Malversacion di placanan di stichting. Hues a rechaza ponencia di abogadonan cu e placanan di donacion no por bisa cu a malversa. Mas cu 55 mil Florin a malversa pa propio uso.

** Mas cu 201 mil Florin a gasta sin cu tin muestra di prosedencia di e placa aki. No ta haya cu por desvia for di e investigacion haci di LandsRecherche.

Haya cu abogadonan no a prueba suficiente cu Paul a haya otro placanan manera regalo di famia y conocirnan pa casamento. Tin carta di famia cu a fia Melony 45 mil Florin. Esaki Hues ta haya suficiente. A desconta tur cos y pa mas cu 159 mil Florin cu no tin splicacion di entrada di Paul. Mas cu 214 mil Florin en total ta haya cu Paul a laba.

    ORGANIZACION CRIMINAL:

Hues a mustra cu Paul a traha hunto cu Aparicio, Capriles y Arends. Paul Croes tabata central den esaki. Considera esaki un organizacion criminal.

Hues a tene cuenta cu Paul su sufri den e caso aki pero no ta desconta den castigo. Si tene cuenta cu 79 dia den limitacion y lo desconta esaki den castigo. Hues ta comparti e parti di Fiscal cu Paul lo no por postula su mes como politico pa eleccion y tampoco traha como ambtenaar.

Fiscal a exigi pa detencion di inmediato. Hues ta haya cu Paul mester ta liber pa por apela su sentencia.

Hues ta haya tur 6 acusacion proba. Hues a condena Paul Croes na 4 aña di prison y pa 9 aña e no por postula como politico.

- Advertisement -

DUNA COMENTARIO

Please enter your comment!
Please enter your name here