Home General Plan di desaster comercial y social necesario

Plan di desaster comercial y social necesario

46
0
SHARE
- Advertisement -

DIARIO a adverti pa problemanan cu lo afecta Aruba

*Resultado crisis Venezuela no ta debi na sancion so

*Refineria di Aruba a tarda pa atende parti di crisis mundial 

ORANJESTAD  (AAN)Ya ta mas cu seis luna cu DIARIO despues di desaroyonan alarmante na Venezuela y na CITGO, a splica e peliger grandi cu Aruba ta aden. Si mira reaccionnan tabata parce cu peliger no tabata existi y cu ta asunto di spera te April pa mira kico lo pasa cu e refineria. DIARIO a adverti cu tin gran posibilidad cu CITGO no ta yega na mira April den su condicion actual.

Ora e situacion a culmina na Venezuela y paisnan a cuminsa retira nan sosten na Maduro, DIARIO a mustra riba e situacion caotico pa comercio y sindicato na Aruba. Atrobe a reina kietud. Awor por comprende cu en berdad tin problema y cu tin contratista cu no a haya placa y cu placa no por drenta.

DIARIO a discuti e informacionnan cu porfin Refineria di Aruba a presenta y cu ta mal noticia pa trahadonan y comerciantenan na Aruba, cu manera DIARIO a indica hopi dia pasa mester a ser poni na haltura di e situacion serio cu nan ta den.

Informacionnan di experto cu DIARIO a ricibi ta mustra cu mester busca ayudo Hulandes pa por traha un plan di desaster comercial y social den e situacion actual di Aruba.

E situacion ta sumamente serio ya cu ningun instancia of persona tin e contesta final pa e actual caos den nan man. Ningun hende sa con e situacion lo sigui desaroya, con e lo termina ni kico lo ta e resultadonan final.

Manera DIARIO ampliamente a comenta a base di investigacion, Aruba a bira parti di un crisis mundial directamente.

Mientras fin di 2018 tabata acerca no tabata cuestion mas si e proyecto refineria lo ser realisa of no, pero kico ta bay pasa na Aruba cu a ser hinca den e aventura di PDVSA pero tambe den e crisis mundial cu Venezuela a provoca.

Mundo a cuminsa tuma medida contra Venezuela y evita cu placa di Venezolanonan ta haya uzo robes dor di grupo Nicolas cu actualmente un grupo no ta reconoce.

E grupo di Nicolas Maduro kier baha e Mericanonan den e gerencia di CITGO na Merca mientras di otro banda e grupo di Juan Guaido cu Aruba tambe a reconoce como Presidente Interino di Venezuela ta introduci cambio den e gerencia di Venezuela.

Den e situacion actual di conflicto, un hecho ta sigur for di Augustus 2018. No por sigui cu e proyecto pasobra no tin placa. A mustra cu ta sigui cu e proyecto te April y a haci manera tabata tin garantia financiero.

Manera DIARIO a adverti pagonan no ta ser haci segun informacion cu awor Refineria Aruba ta presenta na final di e careda.

Mientras Refineria di Aruba no ta duna e bista real y total di e situacion y mescos cu Venezuela ta tene na e ultimo desaroyonan cu Merca a stop placa di Venezuela cay den man di Nicolas Maduro, informacionnan ta indica cu mester bin cu un plan pa atende cu trahadonan y comerciantenan cu tin relacion comercial cu CITGO na Aruba y mester pidi Hulanda asistencia pa yega na un solucion.

Ningun hende sa cuanto e conflicto lo dura, ningun hende sa kico lo sosode finalmente. Instancianan oficial financiero y monetario di Aruba ta sinta for di 2017 cu e pregunta kico CITGO ta representa pa Aruba.

Awor mester traha un plan di emergencia pa CITGO pero tambe pa e situacion di turismo cu por ser directamente afecta dor di CITGO na diferente forma.

Companianan ta saca nan personal for di Venezuela cu ta bira zona di peliger dilanti costa di Venezuela. Mas y mas atencion mundial ta dirigi riba desaroyonan den vecindario directo di Aruba, cu por influencia turismo na Aruba.

Tin mas peliger na horizonte pa turismo sigur den e grupo mas grandi cu ta bin di Merca. No por sigui cu e actitud actual di spera kico tempo por trece.

Mester presenta pueblo un plan di emergencia comercial y social pa asina por enfrente un situacion sumamente serio cu ta desaroya.

DIARIO, cu durante ultimo lunanan a presenta informacion concreto cu diariamente ta ser confirma awor, ta sigui investiga tur loke ta pasa pa asina informa Aruba cu ta den un situacion sumamente serio.

- Advertisement -

DUNA COMENTARIO

Please enter your comment!
Please enter your name here