Home General Prensa liber a demostra di ta e instrumento di democracia

Prensa liber a demostra di ta e instrumento di democracia

99
0
SHARE
- Advertisement -

Comunicacion a kibra isolacion dictatorial di Venezuela

*Tecnologia moderno ta cambia strategia politico peligroso

*Mundo liber a contesta menasa di forsa militar bruto 

ORANJESTAD (AAN) — Den e escenario actual di Venezuela, mundo a tuma nota con prensa liber por evita ripiticion di kiebra total di democracia. Mientras e regimen di Nicolas Maduro a crea un escenario cu na fin di 2018 a crea panico y susto den e region Caribense y na America Latino, Juan Guaido a haci uzo di Constitucion y reglanan democratico di e pais pa kibra e efecto paralitico di miedo. Prensa a haci uzo di medionan moderno di comunicacion pa mundo por a bira participante directo den e desaroyonan na Venezuela.

DIARIO durante ultimo dianan a mantene contacto cu personanan cu ta versa den e tema di strategia politico mundial pa asina por informa su lectornan na e nivel cu e crisis internacional cu a desaroya den porta di Venezuela ta exigi.

A ser splica na DIARIO cu loke ta pasa awe na Venezuela mester ser poni den e contexto mundial di historia. Gruponan extremista cu kier coy poder na un pais, ta haci uzo di strategia politico cu desaroyonan moderno ta stroba na e momentonan aki.

VENEZUELA NO A LOGRA PARALISA MUNDO LIBER 

Opresion militar, violacion di derechonan humano, dictadura, forsa bruto y accion scondi ta e fortalesa di expansion comunista, cu a haci posibel pa e dictadura socialista por a plama rond mundo den un tempo cortico.

E strategia di paisnan comunista cu a haya nan baluarte na Rusia cu derota di e Tsaar di Rusia na 1917, tabata uzo di poblacion mas debil di paisnan cu a ser priminti eliminacion di pobresa y un supuesto gobernacion dirigi riba mehoracion di condicion di bida di pobernan.

Comunismo y socialismo a ser pinta como enemigo di discriminacion, poder di placa y rangonan social.

Semper el a duna resultado pa e gruponan comunista haci nan entrada y unabes na mando asumi poder dictatorial, cu ta un di e exigencianan pa comunismo por mantene su mes.

Na momento cu un regimen comunista haya poder, e pais ta ser isola. Ta kibra contactonan cu mundo, crea miedo y panico den pueblo, uza opresion militar pa destrui hende contra comunismo cu ta permiti solamente un circulo chikito gosa di e bienestar di e pais, cu no ta alcansa e pueblo cu ta bira esclavo di estado.

Nicolas Maduro no a logra paralisa mundo liber cu menasa. Awe mundo ta reuni na e fronteranan caminda paisnan liber ta topa cu poblacion Venezolano en busca di su libertad.

COMUNISMO TA SCLAVITUD COLONIAL DI SIGLO 20 

Comunismo ta basa riba dos aspecto historico cu dirigentenan comunista ta bisa cu nan ta opone.

E sistema comunista ta haci miembronan di un comunidad bira esclavo di gobierno. Hustamente e politiconan cu haya poder na un pais pasobra nan ta presenta un cara contra sclavitud, ta introduci un sistema di esclavo moderno.

Derechonan humano universal ta stop di existi. E desaroyo di ciudadanonan ta depende completamente di e deseo di e gobierno, cu dicidi futuro di muchanan cu for di edad tempran ta ser educa segun e sistema comunista y no ta permiti nan mira e bentaha di mundo liber.

Un sistema di “casta” (rango social) ta ser introduci den cual e aliansa cu gobierno ta decisivo.

Militarismo basa riba hendenan cu no tin consenshi ta ser imponi riba hobennan, cu no conoce e moral di mundo liber. Nan ta bira e instrumento mas importante di gobierno comunista cu ta uza violencia, tortura, destruccion humano pa por implementa comunismo.

Nan ta yuda den e expansion di comunismo. Nan bida no tin balor y nan no conoce balor humano. Nan ta bira arma contra un comunidad, cu ta ser educa segun normanan comunista cu ta contra esencia di moral di mundo liber. 

ISOLACION DI PUEBLO CU MESTER KEDA BOBO 

Comunismo ta isola pueblo cu mester keda bobo.  Profesionalnan y personanan cu no kier entrega nan capacidad, inteligencia y conocemento na comunismo, ta ser persigui y isola di comunidad.

Medionan di comunicacion ta ser domina pa gobierno comunista, cu no ta permiti mundo mira realidad di loke ta pasa na e pais y asina ta evita cu otro paisnan ta nenga di acepta comunismo pa su resultadonan.

Educacion di pueblo ta pa sirbi estado, mescos cu e trabou cu cada hende lo traha y e desaroyo como ser humano.

Gobierno comunista ta dicidi riba e rango di educacion y ta percura pa su profesionalnan ta na su uzo. Entre otro conocemento medico ta ser uza pa bishitantenan cu mester crea e impresion cu e pais ta den progreso mientras e poblacion mes ta pasa den problema serio.

PRENSA LIBER A DESTRUI E ULTIMO FASE COMUNISMO NA VENEZUELA 

Venezuela tabata un paso di un gobernacion comunista dictatorial cu no por a ser elimina facil.  E hecho cu na varios pais na mundo e exito Cubano no ta presenta su mes pa comunismo, ta relaciona cu e comunicacion mundial cu ta haci posibel pa e pais evita un isolacion total.

Nicolas Maduro a completa e plan di Chavez cu pa haya poder mester a entrega e pais na e cadena comunista cu a haya dominio riba tur rikesa di e pais. Expansion comunista ta sirbi e hefenan di estado y nan grupo directo.

Na 2018 Nicolas Maduro a manipula cu fecha di eleccion pa presidencia di e pais y tambe cu e forma cu eleccion liber segun regla internacional mester ser teni.

E huida di Venezolanonan tabata di acuerdo cu loke ta pasa na hopi pais cu ta a punto di ser someti na e cadena comunista.

Rusia y China a haya e rienda financiero den nan man pa asina nan por a haci uzo di rikesanan di Venezuela.

E strategia comunista no por a ser completa, ya cu na momento culminante mundo liber a contesta. Prensa y tecnologia moderno a haci posibel pa mundo na forma directo tuma nota di tur loke tabata pasa na Venezuela.

Paisnan democratico a uni pa brinda apoyo na e grupo Venezolano cu ta lucha pa democracia.

Esaki a haci posibel pa awe mundo ta reuni na fronteranan di Venezuela sin uza di violencia pero bou bista di e comunidad internacional cu ta kibra e isolacion di Venezuela.

E menasa di Rusia y otro paisnan comunista no a duna resultado mientras e pais mes ta prepara pa lucha pa regreso di democracia.

DIARIO durante ultimo lunanan a trata na duna su lectornan un bista riba tur suceso na Venezuela cu awe ta lanta para pa un futuro nobo na man di mundo liber y segun regla democratico. Prensa y comunicacion moderno a kibra sclavitud, strategia comunista y a saca Venezuela for di e menasa di isolacion den violencia militar!

- Advertisement -

DUNA COMENTARIO

Please enter your comment!
Please enter your name here