Home Gobierno Prome Minister ta splica kico por spera si Venezuela lo bolbe cera...

Prome Minister ta splica kico por spera si Venezuela lo bolbe cera frontera cu Aruba

198
0
SHARE
- Advertisement -

ORANJESTAD (AAN) – Prome Minister, contestando un par di pregunta di DIARIO, den conferencia di prensa reciente, tocante kico lo sosode en caso cu Venezuela bolbe cera su frontera cu Aruba di forma unilateral.

E dignatario a indica cu na Januari aña pasa, tempo cu gobierno di Venezuela a tuma e decision unilateral y sorpresivo, di cera e frontera cu Aruba, e tabata un “stress test” pa Aruba, encuanto con bon prepara nos ta pa algo asina.

A resulta cu Aruba por a saca su curpa afo. Prijs di productonan a bira mas caro, lamentablemente, pero toch despues cu e frontera a habri cu nos a haya algun fruta y berdura mas for di Venezuela, e prijsnan no a baha, y esaki ta loke ta sosode den un mercado liber ora bo haya cosnan asina, te ora Minister Xiomara Ruiz Maduro logra di controla e prijsnan di fruta y berdura fresco, cu tambe el a splica con dificil esey ta.

Mientras tanto Aruba a busca otro avenidanan pa importa fruta y berdura, pero en berdad desde cu e fronteranan a bolbe habri tin aspectonan hopi stricto poni cu no ta hopi boto ta bin cu fruta y berdura, y e reglanan no ta gobierno di Aruba a impone nan, pero Venezuela a hacie.

E dignatario a indica cu for di momento cu gobierno di Venezuela a acusa Aruba di contrabando, nos gobierno a contesta nan cu nan tambe tin un rol pa haci di controla ken ta sali di nan pais, y si ta sali legalmente.

Anto e palabracion ta cu si bo kier sali di Venezuela pa Aruba den un di e botonan, tin cu bin for di un waf so cu ta di Estado Falcon, mester tin e permisonan regla aya, y na momento cu e boto sali e haven meester aya ta tuma contacto cu e haven meester di Aruba, y asina e sa ken ta yega y kico ta trece den e boto.

Si e boto no tin e permiso y no a avisa di adelanta e no por drenta na nos waf. E palabracion aki a wordo haci caba y esey ta pone cu e fluho ta menos, e dignatario a splica.

E mandatario a señala tambe cu Minister di Economia y Finanzas a haci palabracion na Colombia den su viahe den e mision comercial, pa importacion di fruta y berdura, y pesey e ta menos preocupa cu loke e ta pa nos hendenan cu ta viaha bay Venezuela y e ta desea cu nada sosode.

Otro situacion cu e minister ta vigilando di cerca pa Aruba no wordo afecta, ta e refineria, cu ta pega caba y no tin mucho avance.

Gobierno ta preocupa loke ta importacion di gasoline, jet fuel, fuel pa WEB pa esakinan no cay den ningun embargo ni disputa internacional, pa nos no bay keda sin locual nos mester. Den esaki tin un plan di contingencia pa percura cu Aruba no cay den e riesgo aki.

 

- Advertisement -

DUNA COMENTARIO

Please enter your comment!
Please enter your name here