ORANJESTAD (AAN) – Diasabra ultimo, 16 di Februari ultimo, e Sociedad di Ingeniero di Aruba (SIA) a reuni cu WEB Aruba N.V, pa discuti tocante e organizacion di actividadnan conhunto den futuro.
“ E vision di SIA ta pa tur miembro ta na un nivel halto di educacion, conocimento y experencia, acepta pa e comunidad di Aruba, pa asina nos no ta dependiente mas di expertonan stranhero. SIA su mision ta pa ofrece un plataforma unda su miembronan por desaroya nan mes door di intercambia conocimento y experiencia, unda nos por topa otro (red) y pa asina sostene otro”.
Tur esaki a base di balor y normanan acepta internationalmente, pero en particular door di e comunidad di Aruba.
E strategia di SIA ta pa organiza tur sorto di actividad tecnico pero tambe socialmente relevante pa su miembronan, duna conseho imparcial, a peticion of boluntariamente na tur organizacion na Aruba incluyendo Gobierno di Aruba.
E obhetivonan di SIA pa reuni cu WEB Aruba N.V. tabata:
Pa haya informacion di prome man di e maneho di energia di WEB
Pa ricibi informacion tocante e proyectonan di WEB cu ta adando
Pa intercambia ideanan y experencia
Pa ofrece WEB un cuadro profesional y indenpendiente pafo di WEB pa cu su maneho di energia
Pa discuti un posibel asociacion cu WEB pa asina conhuntamente organiza actividadnan
Durante e reunion e management y expertonan di WEB a duna SIA un presentacion extenso tocante di nan maneho y proyectonan.
WEB a presenta nan strategia pa cu e periodo di 2013 – 2020 cu ta yama R.A.S. y kiermeen confiable, acekible y sostenible. Pa ehecuta e strategia aki a introduci un modelo nobo di negoshi cu yama CANVAS.
Pa realiza su strategia WEB ta traha estrechamente huntu cu su compañeronan tecnico, entre otro Brattle Group, ABB, NREL, TNO, K&M, Tesla etc.
E atencion principal di WEB ta pa uza menos Fuel Oil (HFO) pisa y pa utiliza mas recurso natural manera biento y solo. Pero di mas principal ta pa mehora WEB su eficiencia door di spaar riba su uso di energia. E resultado tabata un exito como cu un reduccion di 40% di uso di HFO a wordo realiza desde 2005. Y e obhetivo di WEB ta pa baha e uso aki mas ainda, hasta e ta premira cu e lo wordo elimina. E fase IV di e proyecto pa desplega motornan recip lo yuda WEB reduci e uso di HFO adicional cu 25%. E proyecto aki lo ta cla den e primer trimester di 2020. Adicionalmente esaki ta reduci e emision di contaminantenan den aire cual lo ta un impacto positivo pa cu e medio ambiente.
Mientras tanto WEB tambe a cuminza pone mas atencion ariba e eficiencia di uso di awa potable. WEB a yuda Gobierno di Aruba pa cu e desaroyo di un mapa cu un ruta pa cu e uso di awa.
Ademas WEB ta exportando su conocimento na otro lugarnan na mundo manera Colombia (e cuidad di Buenaventura, Valle del Cauca etc.) unda nan ta experencia e mesun problemanan.
SIA a keda hopi impresiona cu e enfoke tan profesional di e team di WEB. Pero alabes SIA a adverti WEB cu nan lo sigui e desaroyonan di WEB criticamente. Un punto di preocupacion cu ta bal la pena pa menciona ta cu durante e presentacion WEB a pone masha poco atencion riba su maneho tocante salubridad di su personal y en general, e seguridad di su procesonan pa cu su personal y vecindario y riba e proteccion di medio ambiente, incluyendo su responsibilidad social corporativa. WEB a responde cu e topiconan aki tambe ta incorpora den e strategia RAS.
WEB a bay di acuerdo pa invita y involve SIA na su reunionnan di consulta y pa yuda SIA organiza actividadnan relata na su proyectonan.
