ORANJESTAD (AAN): Diahuebs mainta di trempan caba, Jay Ras a cuminza prepara pa un Island Tour cu e tin cu turistanan, cu a book esaki via e compania “Around Aruba Tours”.
E ta yuda e compania de vez en cuando como Tour Guide, y Jay semper ta un persona hopi social, di bon manera, atento, y cla pa contesta cualkier pregunta cu turistanan tin. E ta ademas un persona cu stima Aruba, y e ta semper duna su 200% di esfuerzo pa e turistanan goza di un Island Tour, y haya balor pa nan placa.
Jay di 27 aña a haya un tour cu a hiba 2 turista na parti costa panort di e isla, y a bay den area di Conchi.
Pa complace e 2 turistanan, e tambe hunto cu nan, a drenta lama pa asina landa na altura di e lugar conoci como “Moro”.
E area di presion halto riba Caribe a bira mas fuerte ultimo dos dianan, y a contribui na un aumento di forza di biento den region. Biento tabatin algun rafaga entre 40 y 61 km/h. Pesey olanan riba lama tabata hopi modera, entre 4 y 7 pia.
Den e lama bruto, na dado momento e tourguide Jay a bay leu y e turistanan a ripara cu e el a confronta dificultad. Despues nan no a mire mas, y rato despues a mira e curpa ta drief. Mesora nan a core sali di lama y bati alarma.
Tabata 12:30 pm, cu yamada a drenta via 911, y asina Centro di Alarma a notifica Polis di e caso aki.
Inmediatamente Polis, como tambe Ambulans a mobiliza pa e lugar. Park Rangernan di Parke Arikok tambe a mobiliza pa Moro.
Polis a yega na e lugar hunto cu personal di Arikok. E turistanan na e lugar, ainda den shock a splica cu nan Tourguide a haya problema den awa y awor su curpa ta drief. Net e momento ey, e curpa no tabata visible mas pa Polis. Autoridad a hasta cuminza pidi yudanza di Polis Maritimo pa purba yuda localiza e victima riba lama. Tambe personal di Bombero a presenta mirando e situacion y asina purba yuda pa sake.
Despues di un rato, e curpa a bolbe aparece, y olanan fuerte a trece e curpa tog hopi cerca di oriya. Esnan presente mes hunto cu Polis a drenta awa y a gare, y sake for di lama.
Pero e no tabata duna señal mas di bida, y Paramediconan presente no por a haci nada mirando con hopi e persona a keda den awa pa basta tempo.
Pa 2:45 pm, Docter Texier a presenta y constata morto Jermain Jayson Rasmijn, mihor conoci como “Jay”. E ta naci na Aruba dia 8 October 1991, pues tin 27 aña di edad.
Slachtofferhulp a presenta pa asina guia e famia den e momento dificil aki di e fayecido. E turistanan tambe lo haya yudansa di Slachtofferhulp mirando cu nan a keda den shock pa loke a pasa.
Jay Rasmijn ta wordo describi pa su famia y amigonan, como un persona hopi alegre, positivo, y ta amigo cu tur hende. Su habilidad di contacto humano, ta loke a pone resalta como un Tourguide. E por landa tambe, pues e lo a confronta problema grandi cu e lama bruto di Diahuebs mainta pa merdia.
DIARIO ta manda palabra di condolencia na famia-, amigo-, y coleganan di e fayecido.
