Home Hudicial Trio cu mas di 10 kilo di cocaina pega na curpa pa...

Trio cu mas di 10 kilo di cocaina pega na curpa pa hiba Hulanda dilanti Hues

301
0
SHARE
- Advertisement -

ORANJESTAD  (AAN) – E trio consistiendo di e homber A.M.(73) naci na Curacao biba na Hulanda, e homber E.L.(34) biba na Hulanda, e muher R.M. (62) naci na Curacao biba na Hulanda, mayan mainta lo mester presenta dilanti Hues pa tratamento di e caso.

Na luna di December 2018 e trio aki a bin den Corte cada pero e caso tabata pro forma. Nan a wordo deteni dia 31 di Augustus 2018 na aeropuerto cu pakinan pega na nan curpa.

Aunke abogado mr. Yarzagaray a mustra cu no por hunga cu salud di A.M.(73) y cu e mester wordo laga liber, Hues ta haya cu e carta cu a ricibi di KIA ta mustra cu por atende A.M. y e, hunto cu e otro dos lo keda encarcela te dia di e caso.

ABOGADO TA CUESTIONA CARTA DI DOKTER

Na December 2018, despues cu Fiscal a lesa e acusacion contra e trio, el a bisa Hues cu e caso no por wordo trata door cu no tin espacion den e schedule di casonan penal. El a propone pa e tratamento tuma lugar dia 1 Maart 2019.

Fiscal a presenta un carta di dokter di KIA relaciona cu peticion di abogado mr. Yarzagaray cu A.M. tin cierto malestar cronico. Fiscal a mustra cu e carta di dokter ta confirma esaki pero no ta haya cu door di esey A.M. no por keda encarcela.

Abogado mr. Yarzagaray a mustra cu e tabata na KIA y e dokter a papia cu e trahador social su dilanti y a bisa cu A.M. no por keda den KIA. El a bisa cu no ta para den e carta tocante di presion di sanger. Segun e abogado e presion di sanger di A.M. tabata hopi halto y en realidad lo mester ta hospitaliza. E abogado a remarca cu no por bay hunga cu salud di hende y cu carta cu no ta bisa tur cos. El a pidi pa suspende detencion di A.M. E ta kere cu e situacion di salud ta mas serio cu loke e carta mes ta bisa. E abogado a mustra na Hues cu e tata di E.L., kende tambe a wordo deteni pa transporta droga, a wordo manda Hulanda door di su salud. El a bisa cu loke el a tende e dokter bisa A.M. su dilanti y e trahador social no ta refleha den e carta.

E muher R.M. segun mr. Yarzagaray ta para riba cu e no tin nada di haci cu e caso.

Abogado mr. Illes a bisa Hues cu E.L. su partner ta den haya yiu. El a pidi pa suspende su detencion pa e bay Hulanda. El a bisa cu lo por stipula un garantia. E.L. tabata yora ora abogado a bay mustra Hues a mensahe cu el a caba di haya riba cel di familiar di E.L. cu ta splica cu ainda e partner no a haya yiu.

REACCION DI FISCAL

Fiscal a reacciona riba A.M. El a bisa cu e carta ta bisa cu A.M. por haya atencion den KIA y no ta bisa cu e no por keda den KIA. Segun Fiscal, abogado mr. Yarzagaray ta compara e caso di tata di E.L. Fiscal a pidi Hues pa rechaza e peticion. Pa loke ta R.M., Fiscal a mustra cu ta hunto nan a registra pa bula. Nan tabata hunto y E.L. a bisa cu R.M. ta envolvi. Ta mas cu 10 Kilo di cocaina a keda confisca. Fiscal a mustra tambe cu no ta promer biaha cu R.M. ta cay sera pa droga. Na 2015 el a haya condena na Hulanda pa un caso di droga. Fiscal a remarca cu E.L. tabata sa cu su partner tabata na estado y aki ta trata di exporta mas cu 10 kilo di cocaina. El a pidi pa rechaza e peticion.

TRIO TA KEDA SERA

Hues a bisa cu pa loke ta A.M. tin indicacion cu e ta malo pero for di carta no ta bisa cu e no por keda den KIA. Pesey Hues ta rechaza e peticion. R.M. su peticion ta wordo rechaza. Pa loke ta E.L. tambe rechaza. Hues a mustra cu ta un caso hopi serio di transporta mas cu 10 kilo. E caso a keda posponi pa 1 Maart 2019 pa 10.45 di mainta.

Abogado mr. Yarzagaray a pidi Hues pa instrui Fiscal pa un carta di dokter riba motibo cu e tata di E.L. a wordo manda Hulanda. El a bisa Hues cu e ta abogado di e tata tambe. Hues a bisa cu e abogado tin derecho di haya esaki y Fiscal mester percura pa esaki.

Mayan ora di tratamento di e caso lo haya sa mas di e traficacion di droga y kico ta e castigo cu Fiscal ta exigi. DIARIO lo informa lectornan di kico a pasa den sala di Corte di Husticia di Aruba.

- Advertisement -

DUNA COMENTARIO

Please enter your comment!
Please enter your name here