ORANJESTAD (AAN): Desde cu e luznan di trafico na cruzada di Palm Beach cerca di Wendy’s y McDonald’s a daña, ta e borchinan di trafico ta bira valido riba e cruzada.
Esey kiermeen cu trafico riba Sasakiweg ta keda cu preferencia, y trafico cu ta bin for di sea Highrise Hotel, of esnan cu ta bin di Misa di Noord, tin di stop y duna preferencia.
Pero den un entrevista exclusivo cu DIARIO, a bin haya sa cu Turistanan Mericano tin un impresion totalmente diferente di e reglanan di trafico di Aruba ora cu luznan no ta funciona.
E turistanan aki a splica, cu nan ta realmente keriendo cu ora cu e luznan no ta funciona, e ora ta e siguiente reglamento ta valido: “E prome auto cu yega tin preferencia, y despues ta alterna di auto-pa-auto”.
Nan no tabatin ni e minimo idea cu Sasakiweg ta e caya cu tin preferencia, y e otronan tin di stop. Nan ta mira e borchi di duna preferencia (triangulo cora) como djis un borchi di “yield”. Nan NO ta mire como un borchi di “stop”.
Y e borchi oranje ta uno cu nan no sa ni su nificacion.
Mirando e hecho cu mayoria turista cu ta bin Aruba ta di Merca, nan sugerencia ta pa pone e borchi octagonal di “STOP” na cada luz di trafico na e cruzada di Palm Beach unda trafico no tin preferencia.
Nan ta kere cu esaki lo yuda reduci e situacion di peligro na e cruzada aki, y posiblemente evita cu tin mas accident.
Awor cu e cruzada a wordo parcialmente cera, e turistanan ta opina cu e ta bira hopi confuso pa nan busca un otro caminda pa asina por yega na nan destino. Nan ta spera cu autoridad di Aruba por considera nan sugerencia y pone e borchinan di STOP aki pa yuda e cruzada. Y ta sugeri chauffeurnan di Aruba pa nan tin mas pasenshi.
Riba e potret por mira un super-impose di imagen, di loke e turista ta sugeri pa pone temporalmente borchi di “STOP” na e luznan di trafico.
