Home Hudicial Un aña di prison pa homber haya cu pistol carga cu bala...

Un aña di prison pa homber haya cu pistol carga cu bala den auto

207
0
SHARE
- Advertisement -

ORANJESTAD  (AAN) – E homber G.D.(32), kende na November 2018 agentenan di Polis a detene cu un pistol Walter carga cu bala, a scucha Hues conden’e na 18 luna di prison di cual 6 luna ta condicional cu un tempo di prueba di 2 aña. Esey ta nifica cu G.D. lo mester sinta 1 aña y e 6 lunanan ta keda condicional.

TUMA ARMA COMO PAGO  

Hues a puntra G.D. pakico e tabatin un pistol carga cu bala. Segun G.D. un guy cu a bin for di Venezuela a yame pa yuda bende pisca. E homber no a pag’e pasobra el a manda placa pa su famia Venezuela. E homber a ofrece e arma. G.D. a bisa Hues cu promer e no kier a acepta pero e Venezolano a bis’e cu e no por bay bek cu e pistol.

Segun G.D., e kier a hiba e pistol Polis pero el a compronde cu Polis lo bay detene. Hues a remarca cu Polis a haya un mensahe di G.D. riba cellular pa e Venezolano kende el a pidi pa balanan y demper pa un 380. Segun G.D., un persona a pidi pa bala y el a yama e persona.

Hues a mustra cu ta promer biaha G.D. ta cay sera. Hues a bisa cu e ta puntra su mes pakico G.D. a acepta e arma como pago. G.D. a bisa Hues cu e momento ey e no a actua corecto. 

EXIGENCIA DI FISCAL

Fiscal a bisa Hues cu e ta haya legalmente proba cu G.D. tabatin un arma di candela cu bala. Fiscal a mustra cu Polis a haya e arma den auto di G.D.

Fiscal a bisa cu e no ta kere e storia di G.D. Fiscal ta haya cu mester baha cu man duro contra esnan cu ta cana arma. Arma di candela ta sumamente peligroso. Aki e caso ta mas serio pasobra G.D. tabatin e arma cun’e y e arma tabata carga cu balanan. Fiscal a exigi 18 luna di prison. 

ABOGADO

Abogado mr. Paesch a mustra cu investigacionnan ta mustra cu e arma aki no a wordo usa. E abogado a bisa Hues cu ta promer biaha cu G.D. ta cay sera pa arma. El a pidi Hues pa condena G.D. na un castigo di prison igual na loke el a sinta caba y un parti condicional. 

SENTENCIA

Hues a sera tratamento di e caso y a bisa cu e ta dicta sentencia di biaha. Hues a bisa cu e ta haya legalmente proba cu G.D. tabatin un arma den auto. Hues ta haya cu G.D. castigabel. Pa cu e castigo, Hues a bisa cu e ta haya e caso aki hopi serio. Hues a tene cuenta cu sentencianan di Hof y a condena G.D. na 18 luna di prison di cual 6 luna ta condicional cu un tempo di prueba di 2 aña.

- Advertisement -

DUNA COMENTARIO

Please enter your comment!
Please enter your name here