Home Hudicial 2 aña di prison pa homber haya cu 2.5 kilo di cocaina...

2 aña di prison pa homber haya cu 2.5 kilo di cocaina den camber di hotel

125
0
SHARE
- Advertisement -

ORANJESTAD (AAN): E homber L.Q. a scucha Hues confirma e exigencia di Fiscal. Hues ta haya proba cu L.Q. ta culpable di tabatin 2.5 kilo di cocaina den kluis di camber di hotel riba 16 Augustus 2018. Hues a condena L.Q. na 2 aña di prison.

EXIGENCIA DI FISCAL

Fiscal ta haya L.Q. culpable di tabatin 2.5 kilo di cocaina den su camber di hotel. E droga tabata den un body pack. Fiscal a exigi 2 aña di prison, kitando e tempo cu L.Q. ta sera den KIA.

DEFENSA ABOGADO

Abogado mr. Martinus a bisa Hues cu ta acusa su cliente di posecion di cocaina. E abogado a mustra cu dia 15 Augustus 2018 L.Q. a bay trip den clubnan nocturno y a topa un amigo. El a bay cu e amigo keda den camber di hotel. Den oranan di merdia un hende a bati na porta di e camber y ora L.Q. a habri e porta, e homber cu e supuesto amigo, a ataca L.Q. L.Q. a notifica seguridad di hotel cu a actua.

E agentenan di Polis cu a presenta na e hotel, a haya permiso di L.Q. pa haci investigacion den camber y ora cu nan tabata den e camber nan a mira cu L.Q. tabatin poco purio blanco na su nanishi. E agentenan a puntra L.Q. si e ta usa droga y el a bisa cu ta usa XTC y de vez en cuando cocaina.

POLIS NO A TRAHA CORECTO

E abogado a bisa Hues cu e agentenan di Polis a saca L.Q. for di e camber y no ta asina manera ta para den e relato di Polis cu L.Q. a sali di su mes. Un agente a bay check den e kluis cu tabata un tiki habri y a haya un body pack yena cu cocaina. A detene L.Q. Na opinion di mr. Martinus, e agentenan di Polis a viola e forma di traha. E abogado ta haya cu Polis ningun momento a mustra L.Q. riba su derechonan.

E abogado a remarca cu ora cu agente a mira purio blanco na nanishi di L.Q., a considera L.Q. como sospechoso y agentenan a deha di bis’e su derechonan e momento ey. Ta hopi mas laat nan a bis’e riba su derechonan. E abogado ta haya cu e momento cu Polis a haci serie di preguntanan, mester a bisa L.Q. su derecho, cual e agentenan no a haci.

E abogado a mustra riba decision di Corte Supremo cu ta cuestiona e forma di actua di Polis caminda no por bay haci investigacion sin cu ta mustra e sospechoso riba su derechonan. Na opinion di e abogado, L.Q. a laga e agentenan drenta pa investiga e asalto contra dje y no manera a sosode cu a haci investigacion caminda L.Q. ta sospechoso. Ningun momento L.Q. a duna permiso pa habri e kluis. E ta haya cu a viola diferente normanan caminda mester exclui e droga como prueba y cu esey ta trece cun’e cu mester declara L.Q. liber.

E abogado a bisa Hues cu personal di hotel tin pin code pa habri e kluis y e hecho cu e kluis tabata habri ta mustra cu otro a habri e kluis aki. El a remarca cu te na November 2018, Polis ta traha un relato caminda ta bisa cu a mira e kluis un poco habri. E abogado ta haya esaki hopi straño. El a mustra tambe cu no a haya fingerprint di L.Q. riba e body pack.

FISCAL TA REACCIONA

Fiscal a reacciona cu enberdad e agentenan a haci pregunta riba uso di droga na L.Q. mirando cu su nanishi ta sushi cu purio blanco. Na opinin di Fiscal, e agentenan di Polis a haya permiso di L.Q. pa haci investigacion den e camber. E agentenan diferente biaha a puntra L.Q. permiso pa haci investigacion den e camber. Door cu el a duna permiso, e agentenan a haci investigacion. Fiscal no ta kere cu aki por bisa cu Polis a viola norma.

SENTENCIA

Hues a sera tratamento di e caso y a bisa cu ta dicta sentencia di biaha. Hues ta haya cu tin suficiente prueba cu L.Q. tabatin cocaina hunto cun’e. Hues ta haya cu L.Q. a duna permiso pa Polis haci investigacion den e camber. E investigacion ta encera cu mester check cashinan y kluis. Hues no ta haya cu Polis a viola norma y no a keda sin bisa L.Q. riba su derechonan. Hues a confirma exigencia di Fiscal y a condena L.Q. na 2 aña di prison.

 

- Advertisement -

DUNA COMENTARIO

Please enter your comment!
Please enter your name here