Aruba Doet 2019 a cuminza oficialmente

    200
    0
    SHARE
    - Advertisement -

    ORANJESTAD (AAN): Aruba Doet, e evento boluntario mas grandi na Aruba organisa pa CEDE Aruba, a celebra nan di siete aña consecutivo.

    Director di CEDE Aruba, Daniel Tecklenborg, a duna un bonbini na Su Excelencia Gobernador di Aruba, Señor Alfonso Boekhoudt y tambe na directiva, director, staff y personal di Casa Cuna, e duo incansable di CEDE Aruba Stephany Phelipa y Thixianne Wever, sin lubida tur boluntario cu tabata presente na Casa Cuna y esnan cu entre diabierna y diasabra lo haci Aruba Doet un tremendo exito y lo trece un diferencia den comunidad.

    Su Excelencia Gobernador di Aruba, Señor Alfonso Boekhoudt a bisa cu Aruba Doet ta yen’e cu satisfaccion grandi ora e ta wak e trabaonan cu ta bay tuma lugar na Casa Cuna, ta asina cu tur trabao cu Aruba Doet ta logra haci, no ta trabao pa wordo ‘mira’ sino ta haci trabao pasobra ta mira cu tin trabao pa haci! Tur hende mester wak e rol cu nan ta hunga den comunidad, pa asina aporta y biba feliz riba e isla aki.

    Gobernador a bisa cu e ta hopi contento pa wak e impacto cu ta logra cu tur boluntario pa haci trabaonan den e dos dianan aki. Tur aporte, pa mas chikito, ta bira algo grandi pa Aruba. El a desea exito na esnan cu a participa, laga e satisfaccion den e trabao aki cu bo ta brinda na otro, ta e motivacion pa sigui cu e trabaonan.

    Manera a indica caba, Aruba Doet ta celebrando nan di siete aña consecutivo y nan ta sumamento orguyoso y nan tambe ta celebra cu pa prome biaha cu henter Reino ta activo riba proyecto di ‘Doet’, kiermen Hulanda y otro islanan tambe a organiza boluntarionan pa yuda proyectonan den comunidad.

    Tecklenborg ta gradici Oranje Fonds, como nan partner principal den Aruba Doet, nan tin siete aña trahando hunto, y el a bisa cu tin mas cu 1.5 miyon florin a wordo inverti den diferente proyectonan durante e añanan. El a gradici tur compania cu den ultimo añanan ta participando activamente, hopi compania ta join cu nan empleadonan y ta probecha pa usa Aruba Doet pa crea ‘team building’ y motiva y trece nan empleadonan hunto. Sin falta tur comerciante cu ta yuda nan cu sponsorships, cu descuento y productonan.

    Un invitado special di e mainta tabata e Mascota di Aruba Doet, e Colibri (Blenchi). E colibri ta simbolo di un gran trahador, un persona cu ta trata duro, como tambe simbolo di tur boluntario cu ta bay haci nan esfuersonan durante e dos dia aki.

    E aña aki nan ta trahando cu 167 organizacion cu ta bay realiza 186 proyecto den diferente ramo, nan ta conta cu alrededor di 3.600 boluntario cu ta bay traha den e dos dia aki, mayoria ta local, pero tambe tin algun turista. Tin turista cu hasta ta planea nan vakantie durante Aruba Doet, y asina aporta na e evento.

    Gruponan cu ta beneficia di Aruba Doet ta gruponan vunerable, manera mucha, hende grandi, hende muher, hobennan y clientenan cu limitacion. Pa loke ta trata e proyectonan, nan ta encera manera verf edificio, construi, remodela of renoba, pero tambe varios actividad social.

    Pa finaliza, Tecklenborg a bisa cu Aruba tin varios reto riba tereno social, enseñanza, medio ambiente, y naturalmente Aruba Doet no ta e solucion pa tur cos, pero e evento ta un simbolo cu tur hende den comunidad por contribui y cu hopi man por logra hopi cos! Nan ta desea tur organizacion y boluntarionan hopi exito. Haci bon y pasa bon!

    - Advertisement -

    DUNA COMENTARIO

    Please enter your comment!
    Please enter your name here