Home Parlamento “BBO ta na 6% y NO 10 % y BBO lo no...

“BBO ta na 6% y NO 10 % y BBO lo no bira 10% tampoco”

64
0
SHARE
- Advertisement -

Parlamentario Setty Christiaans-Yarzagaray:

ORANJESTAD (AAN):  Como un Parlamentario cu ta uza data como su fuente di informacion y pa brinda informacion tambe na pueblo, Parlamentario Setty Christiaans-Yarzagaray a indica categoricamente cu BBO ta na 6% y lo no subi na 10%.

E Parlamentario ta indica cu semper ora e informa pueblo di algun topico, e ta uza publicacionnan di Centraal Bureau Statistiek (CBS) of Banco Central, cu ultimamente ta sacando resultadonan positivo. Mirando e hecho cu ta uza dato pa papia, e Parlamentario ta acentua cu e ta desea di aclarea tocante BBO.

Gobierno actual a tuma mando di pais Aruba na november 2017 y e tempo ey BBO tawata 3.5%. Parlamento aña pasa na juli a pasa un cambio di e ley di BBO y el a hise cu 2.5% pues awor BBO ta na 6%. Esaki ta muestra cu Mike Eman ta gañando un biaha mas cu Gobierno a of lo hisa BBO na 10%.

“No laga Mike Eman gaña bo cu BBO ta 10%. No laga Mike Eman cambia bo pensamento door di bisa algo 100 biaha pa hunga cu bo pensamento. Por busca semper informacion riba website di Parlamento of puntra un di nos”, Parlamentario Christiaans-Yarzagaray a enfatisa.

E Parlamentario corectamente a indica cu esaki tabata e manera cu Mike Eman a haci den su gobernacion unda cu e tawata ripiti algo suficiente biaha pa pueblo kere sin cu niun hende ta pensa pa puntra Mike Eman pa un documento pa hustifica loke cu e tawata bisa. Atrobe Mike Eman kier bolbe hunga cu pensamento di pueblo bisando y ripiti cu BBO ta 10% sin cu ta presenta un documento na unda ta indica esaki. E ta gaña uza un raport di IMF sabiendo cu conseho di IMF ta riba VAT y no BBO y asina aki, Mike Eman kier sigui hunga cu inteligencia di Pueblo.

Parlamentario Christiaans-Yarzagaray ta expresa cu Mike Eman a perde tur credibilidad y pa colmo el a core pa su responsabilidad y keda sin representa su votadonan den Parlamento. Si e mes tawata den Parlamento e lo sa cu aña pasa e ley di BBO a wordo cambia y e ta na 6% awe. Si Mike Eman a representa su 3 asientonan den Parlamento of si e ta tuma tempo pa lesa, e lo tawata na haltura cu BBO ta na 6% y no na 10% of atrobe e kier hunga cu inteligencia di e pueblo aki?

Nos tur por corda cu e mesun Mike Eman aki den pasado a ripiti sin cansa pa gana eleccion, cu e lo elimina BBO y no a haci esaki. Mas bien despues cu ela bahe y hinca finansas di Aruba den problema, e’la hay’e ta hisa BBO te 3.5%. Esaki, segun Parlamentario Christiaans-Yarzagaray ta ‘kiezersbedrog’ cu te awe pueblo no por lubida.

E Parlamentario ta conseha pueblo, cu si tin algun duda, pa sinti e libertad pa acerca Parlamento pa informacion. Por tambe bishita e website di Parlamento y baha cualkier documento of ley cu Parlamento ta pasa, pues tambe esun di crisisheffing temporario unda a aproba BBO (BBO+BAZV+BAVP) na 6%.

“BBO NO ta 10% y e Parlamento aki lo NO permiti pa BBO bira 10% tampoco”, ta loke cu Parlamentario Christiaans-Yarzagaray a finalisa bisando.

- Advertisement -

DUNA COMENTARIO

Please enter your comment!
Please enter your name here