Analisis
E pakete di balornan di un pueblo ta hancra den su cultura, cu ta ser carga pa tradicion. Ora tradicion bira un regla sin contenido basico, e ta perde su sentido.
Unabes e motibo tras di un tradicion bay perdi, e tradicion ta bira algo cu nos ta haci pa custumber. E pilarnan cu mester carga nos cultura ta basha abou y hunto cu nan e balornan di nos pueblo, su sentido di husticia, di sentimentonan humano y balor di hende.
Cuaresma no conoce disfraz pa consenshi
Cuaresma no ta resultado di Carnaval. Historia mundial a uni diferente coriente pa forma e comunidad internacional cu nos conoce awe.
Cuaresma ta un celebracion religioso importa na Aruba dor di Cristianismo cu ta basa su mes e comportacion humano segun e consenshi di pueblo y ciudadano.
Cuaresma a ser hustamente introduci pa evita cu ta disfrasa Cristianismo, deshaci di su contenido real y asina destrui e esencia di Cristianismo cu ta e balor di hende como yiu di Dios.
Pa Cristianismo na mundo no tin balor mas grandi cu hende manera Cuaresma ta afirma. Dios Yiu, Cristo, a bira hende pa educa hende segun leynan di Dios. Ora den practica, el a entrega hende tur regla di Cristianismo legitimo, El a acepta morto na cruz pa salba hende y a resucita como triunfo di hende riba morto y regreso di hende cerca Dios.
Den Cuaresma hende ta bay refleha riba e forma cu consenshi ta haya expresion den comunidad.
Cuaresma 2019 ta presenta comunidad internacional y di Aruba cu ta exigi analisis personal y reflexion.
Violencia contra e ser inocente y indefenso
Te cu reforma di siglo pasa, e tradicion di Cuaresma tabata encera cu ta stop tur fiesta, ta adapta alimento na loke ta necesario pa e curpa humano, cu no tabata cubri cu demasiado adorno.
Medionan di comunicacion tabata deshaci di musica alegre y tabata presenta programanan adapta na Cuaresma como temporada pa yuda comunidad evalua e comportacion individual y comunitario.
E pakete di balor tabata ser proteha y conserva den e periodo cu na school muchanan tabata haya les den e pakete moral di un comunidad, cu ta conecta directamente na religion. Na cas tabata nan tabata tin e disciplina di Cuaresma cu tabata sostene e formacion di ciudadano di futuro.
Awe sucesonan den comunidad ta mustra cu mester uza e berdad di Cuaresma pa yega na e consenshi original cu ta evita babynan abusa y mata, muchanan y muhenan cu no por defende nan mes di abuso sexual y violencia, ancianonan den dolor. E balor di famia, prostitucion abierto, caida di balor humano, droga ta temanan cu sigur mester discuti si nos ta duna contenido na Cuaresma.
Durante Cuaresma diariamente den tur sector cu ta educa y forma consenshi di pueblo, mester discuti e motibo tras di perdida di balornan cu ta e motibo tras di casonan cruel cu comunidad ta registra.
Cuaresma 2019 ta reto contra indiferencia y cobardia
Aruba ta observa Cuaresma 2019 den un situacion cu nunca el a pensa di conoce. Cuminda di hende cu hamber ta ser kima na Venezuela. Ser humano ta ser destrui pa poder.
Mundo ta yena cu refugiado. No tin paz ni trankilidad. Hende a destrui naturalesa cu a cambia dor di actitud di hende, cu a entrega su balor.
Hende a bira corupto, cobarde, indiferente pa asina evita problema y a deshaci di Dies Mandamento cu den Cuaresma mester ta base di reflexion. Cristiannan mester defende tur cu abuso a condena na un caminda di cruz.
Hende ta maneha mundo y hende mester asumi su responsabilidad den Cuaresma cu no mester di multitud pa para canto di caminda yora mientras inocente ta carga cruz.
Cuaresma 2019 a bira un reto. Un pregunta ta ser haci na tur cu ta Cristian: “kico bo consenshi ta dicta?”
Na 2019 Aruba no por bisa cu e no sa kico ta dolor di hende. Abuso humano ta stroba bida normal.
E hende mester bira central. E hende cu mester por conta cu hende cu ta yuda pa e carga su cruz y ta evita cu hende ta bira asina barata den un comunidad, cu cualkier abusado por claba hende na cruz.
Cuaresma 2019 ta exigi pa Cristiannan lanta para contra e Calvario humano cu mester ta lagrima di Cristianismo.
Pa haci hende central mester di consenshi cu den Cuaresma mester haya tur atencion pa asina dicidi con feliz futuro lo ta.
