Home Hudicial Cuatro aña di prison exigi pa homber sospecha di a mishi cu...

Cuatro aña di prison exigi pa homber sospecha di a mishi cu su mesun yiu muher y su sobrina

1784
0
SHARE
- Advertisement -

ORANJESTAD (AAN): Manera DIARIO a publica, Diabierna di merdia te den oranan di atardi, Hues di Corte den Promer Instancia, a trata e caso penal cu Ministerio Publico a cuminsa contra e homber di inicial F., miembro di seguridad di CEA, kende ta worde sospecha di a mishi cu su mesun yiu muher menor di edad y su sobrina tambe.

E sospechoso F., durante tratamento di e caso a bira hopi emociona y a bira wak den direccion di e victimanan y a expresa su mes. Un miembro di CEA a hala su atencion pa e keda trankil. Aunke F. ta para riba cu tur e cos aki ta un complot di su ex-señora contra dje y cu e ta inocente, Fiscal a exigi 4 aña di prison.

    ACUSACIONNAN:

E acusacionnan cu Fiscal a presenta den Corte contra F. ta:

(*) Den e periodo di 16 di Mei 2011 te 15 Mei 2013, el a abusa di un mucha cu ainda no tabatin 12 aña.

(*) Den e periodo di 26 di Mei 2010 te 25 April 2015, el a abusa di un mucha cu ainda no tabatin 16 aña.

E acusacionnan di Fiscal ta mustra cu durante algun aña, e sospechoso F. tabata abusa di muchanan menor di edad, kendenan pa colmo ta su mesun yiu muher y su sobrina.

    MISHI CU SU YIU MUHER:

Hues a puntra F., kico e ta pensa di e acusacionnan.  E acusado F. ta para riba cu e no a mishi cu e personanan. Hues a mustra cu e mama di e mucha, cu a haci denuncia, a bisa cu el a separa di e tata, F., promer cu e mucha muher a nace. E no a reconoce e mucha. E mama a bisa cu e yiu homber y e yiu muher tabata bay cu F. despues di school.

Den sala di Corte, e homber F. a desmenti esey. Hues a sigui bisa cu e mama a bisa cu pa un tempo el a ripara cu e yiu muher a cuminsa corta su curpa y a bay asina leu di laga mucha prik cu potlood “Faith” ariba su man. E yiu muher a bisa cu el a haci esaki pasobra e gusta dolor.

Juffrouw di Scol a informa e mama, cu e mucha ta rebeldia na scol y tabata sin animo. E mama a bay di acuerdo pa laga yiu bay un programa cu e Docente a propone caminda un experto lo papia cu e mucha.

Un dia, e Docente a pidi e mama pa bay Scol y dilanti e juffrouw y otronan cu ta atende cu e programa, e yiu a cuminsa yora y a bisa cu tempo cu e tabata den 3de y tabata cuminsa bay cerca su tata F., e tata tabata mishi cun’e na su parti priva. Tambe cu el a bisa cu F. a lag’e core auto ora e tabata mas grandi y F. lo tabata mishi cu su parti intimo ora e tabata stuur.

   SOSPECHOSO DESMENTI:

E homber F. a desmenti esaki totalmente den Corte. El a bisa Hues cu Voogdijraad a prohibi’e pa bay cerca su yiunan. Segun F. dos biaha el a busca e yiu muher na Parada di Bus y a hib’e cas pa come hunto cu F. su partner y despues a hib’e back na su wela.

Hues a puntra si el a hiba e mucha den camber manera e mucha ta bisa. El a bisa Hues cu e mucha a keda den sala, come y a hib’e back na su wela. El a desmenti cu el a busca e yiu muher y su yiu homber. Segun F. awor na grandi e tin contacto cu su yiu homber.

   COMPLOT DI MAMA:

Segun F. esaki ta un complot di e mama y e no ta culpa su yiu muher. Hues a mustra cu den e caso aki ta e juffrouw di school a bin saca afor, papiando cu e mucha, cu su tata a mishi cun’e. Hues a mustra cu e mucha tabatin berguensa y no tabata kier pa conta su mama of famia. A logra convence e mucha pa bisa e mama y esey a sosode na school.

Hues a mustra cu e mucha mes a bisa cu tempo e tabata chikito, su tata a mishi na su parti intimo. Ora cu e ruman homber no bay, F. tabata haci’e. E mucha a declara na Polis cu e no ta corda cuanto aña e tabatin y tampoco den cual klas. El a bisa cu un biaha F. a bay hopi leu caminda a bay banda di lighthouse y el a laga e mucha pasa man na su parti intimo.

Segun e mucha, despues cu e tin 14 aña, e ora e acusado F. no a haci’e mas. E mucha a bisa cu door cu e ta forma parti di un grupo di Misa y e parti aki ta molesti’e ora ta papia di ta limpi. E mucha a bisa cu varios biaha a pasa cu F. ta bay baña y ta sali for di baño full sunu y ta yam’e pa e wak.

E acusado F. mes a desmenti tur cos. El a bisa cu ora el a separa, e ‘ex’ a bis’e cu e lo bay tin un bida duro, y a prohibi F. di mira e muchanan.

Segun F., ta ora e yiu muher tabatin 16 aña el a mir’e. Segun F. ora e bay cas pa mira si yiunan, e mama tabata yama Polis p’e. Ta via Whatsapp e tabatin contacto cu nan. F. ta haya cu ta e mama ta tras di henter e asunto aki. E mama a set up e muchanan contra dje.

   OTRO VICTIMA:

Hues a mustra cu e mama di e otro victima, na Februari 2018 a haci denuncia di abuso di F. contra su yiu muher menor di edad cu ta sobrina di F.

Segun e otro Mama aki, e tabata mira cu e mucha tabatin problema pa actua den comedia. E mucha a cuminsa yora y bisa cu e no ta e mucha cu nan ta kere cu e ta. El a bisa cu el a haci algo cu no ta su identidad. El a bisa cu F. a abusa di dje tempo e tabata chikito. El a bisa cu e no a revela nada pasobra F. a menaza cu si e papia e “lo mata su tata”.

E mishimento tabata sosode durante hungamento di Sony PlayStation, caminda e mucha lo tabata sinta riba scochi di F., y e acusado tabata pone un cusinchi riba e mucha y tabata mishi cu su parti intimo. Esaki tabata sosode varios biaha.

   SOSPECHOSO A REACCIONA DEN CORTE:

Na dado momento F. a bira hopi emociona. El a bira wak patras na e victimanan y a puntra “Kico ta pasando cu bosonan?”.

Un funcionario di seguridad di CEA den Sala di Corte, a hala su atencion pa e keda trankil y scucha kico Hues ta bisa di e caso. Por a nota cu e caso tabata traha hopi riba F. Su wowonan tabata yen di lagrima.

El a bisa Hues cu e sa bay hunga Sony PlayStation cu e yiu homber. El a bisa cu e mucha muher sa drenta wak nan hunga un rato y sali back.

E acusado F. a bisa Hues, cu e tin 6 luna encarcela riba un “e di”.  E ta haya esaki inhusto. F. a bisa cu e tabata sinta riba un stoel y no riba cama. El a bisa cu tur e cosnan aki ta gañamento. Segun F., no ta berdad cu el a menaza e mucha cu lo mata su tata si e ta bay papia.

    BASILA OTRO MUCHA:

Hues tambe a mustra cu tabatin un otro mucha di 14 aña di Misa caminda riba Facebook Messenger a papia hopi cos cu e mucha.  Y aki tin prueba di e mensahenan!  Autoridad no ta haya cu esaki ta “un forma normal” di papia cu un mucha.

Hues a lesa algun di e messages, y e combersacion ta bay caminda F. tabata papia cu e mucha “dushi” y si e mucha ta gust’e.

F. a bisa Hues cu e ta haya cu e tabata papia normal cu e mucha. El a bisa cu e tabata biba cu un muher Venezolano pa hopi aña y esey ta e forma di papia.

   EXIGENCIA DI FISCAL:

Fiscal a bisa cu F. ta desmenti tur cos. Pero tin suficiente prueba. Tin denuncianan haci y mirando declaracion di e victimanan, Fiscal ta haya cu tin suficiente prueba. Fiscal a bisa cu aki no ta trata di un complot pa regla cuenta cu F. sino cu algo realmente a pasa.

E hendenan rond di e victimanan a mira cu e victimanan a cambia den comportacion y cu nan ta wanta algo. Tambe Fiscal a mustra e acercamiento di F. cu e mucha muher di 14 aña. Fiscal a sigui bisa cu F. ta haya cu su forma di papia tabata masha normal.

El a bisa cu e tabatin relacion cu un Venezolano hopi tempo y e expresion di “dushi” ta algo masha normal.

Na opinion di Fiscal, tin suficiente prueba cu F. a mishi cu e dos muchanan. Fiscal a bisa cu no por prueba cu realmente F. a mishi cu pecho di su mesun yiu muher y a pidi Hues pa declara F. liber pa esey.

Pa cu e castigo Fiscal a bisa cu e ta tene cuenta con muchanan a keda afecta. El a tene cuenta cu F., como miembro di CEA, ta sera den KIA. Door cu ta trata di muchanan menor di edad, Fiscal ta considera esaki mescos cu violacion. Esaki a sosode diferente biaha y a tacha integridad di e muchanan. Fiscal a tuma F. na malo cu a hacie cu su propio yiu muher y su sobrina. Fiscal a exigi 48 luna di prison, kitando e tempo cu e ta sera den KIA.

- Advertisement -

DUNA COMENTARIO

Please enter your comment!
Please enter your name here