ORANJESTAD (AAN): Tanto Polis, como tambe Bomberonan den Vehiculo di Rescate, y Ambulans a haya nan ta mobiliza Diabierna atardi urgente riba e caminda di asfalta cu tin entre beach di Arashi te na Faro di California.
Esey ta debi cu den e birada skerpi na Arashi, un dama den un Mitsubishi Pajero cu number A-69699 a perde control y bolter y keda pega den e vehiculo.
Ora cu Polis a yega, nan a nota cu e persona ta pega den e vehiculo, y mester di yudanza experto pa sake. Bomberonan a yega y mesora a traha riba un plan. Na mesun momento a habri e hood pa asina desconecta e bateria di auto, prome cu algo mas serio socede.
Cu ayudo di testigo, polis y personal di brandweer a saca e victima for di den auto pone drumi un rato riba e auto den banda.
Mientras a warda pa ambulans presenta y asina atende cu e victima di biaha pa keda transporta pa hospital. Polis di trafico tambe tabata presente.
