Aeropuerto na Caracas den trankilidad:
ORANJESTAD (AAN) – Un vuelo for di Venezuela pa Aruba, a wordo coordina pa Diabierna awor, pa pasaheronan cu pasport Hulandes, y nan a wordo pidi pa ta na Aeropuerto pa 5 or di mainta pa e vuelo programa pa sali pa 11’or di mainta.
E pasaheronan mester a warda autorizacion di Miraflores pa nan por cuminza embarca, pa e vuelo por a sali pa Aruba.
Jose Arends, un ciudadano Arubano cu tabata pendiente di e vuelo aki, a comenta den un entrevista telefonico cu nos redaccion cu el a topa cu seis Arubiano, tambe un Curazoleño, y un dama Venezolano biba na Hulanda.
El a menciona cu e ambiente na aeropuerto tabata bon, sin ningun problema, y cu no tur loke ta pasando aya ta sosode den henter e pais aki, cu ta hopi grandi.
Arends a comenta cu na Caracas tin manifestacion pero na un margen chikito, y no manera un 23 di januari cu e tabata tey tambe, y un multitud inmenso a sali caya pero no tabata tin matanza y tur cos a bay trankil. E tabata na Barquisimeto dia 23 di Februari tambe, pero aya nada particular a sosode. Ora e manifestacion a pasa tur hende a bay nan cas trankil.
Otro pasahero, un dama di Corsow, a conta cu el a yega Venezuela dia 18 di Februari pa keda cuater dia na Valencia. Nan tabata pa regresa dia 21 pero e frontera a wordo cera dia 20. Pa bin bek nan a bise cu e tin cu cumpra otro ticket pa haci su viahe via Panama. Pero e dia ey tabata tin welga y e no por a cruza yega Caracas y a perde su vuelo.
E dama aki ta riba e lista pero su amiga cu ken el a biaha no ta riba e lista y nan a bise cu e no por bula.
