Home Editorial Editorial: Famia ta e responsabilidad mas grandi di homber y muhe

Editorial: Famia ta e responsabilidad mas grandi di homber y muhe

45
0
SHARE
- Advertisement -

Tabata na 1975 cu mundo a celebra Aña di Hende Muhe. Na 1977 Nacionnan Uni a pidi paisnan afilia pa celebra Dia di Hende Muhe pa pone enfasis riba e lucha cu a ser hiba pa e ser femenino haya mes derecho cu e ser femenino.

Lamentablemente e lucha di hende muhe den transcurso di añanan, mescos cu tur lucha cu ta mara na aceptacion di reglanan nobo pa civilisacion moderno, a ser saca for di su proporcion.  Un decada despues di proclamacion di Dia di Hende Muhe, mundo a cuminsa preocupa su mes cu e tema di “dehumanisacion” di hende muhe, debi na interpretacion robes di emancipacion.

Na momento cu realmente mester a sigui vigila e resultadonan di aplicacion robes di loke ta ser yama derecho di hende muhe, comunidad moderno a conoce diferente cambio, cu a stroba comunidadnan local pa sigui traha riba e materia tan importante.

Infiltracion di ideanan internacional a afecta tur pais na mundo. Pa Aruba e era di tecnologia di siglo 20 a nifica cambio serio den e pakete moral cu tur consecuencia cu e tin pa comunidad.

E derecho legitimo di damanan den un comunidad, ta mara directamente na e derecho di tur ciudadano cu mester tin e oportunidad y libertad pa desaroya nan mes segun nan deseo y habilidad.  E ser femenino mescos cu e ser masculino mester tin e oportunidad pa segun su talentonan y conocemento personal, carga responsabilidad pa su comunidad.

Emancipacion di hende muhe, mester a conduci na un miho comunidad, loke no tabata e caso.  “Libertad” di hende muhe a haya un contenido negativo y tabata dirigi na entrega muhe mes derecho cu hende homber riba tereno negativo pa e comunidad.

Awe den tur honestidad mester pone e emancipacion di hende muhe den e contexto corecto. Homber y muhe a haya e derecho pa desaroya nan mes pa asina tur talento presente den un comunidad por ser poni na sirbishi y elevacion di e comunidad.

Segun e sistema democratico,  tur miembro di un comunidad tin mes derecho pero tambe mes responsabilidad.  E libertad di homber of muhe no por ta contra bienestar di e comunidad pero mester sirbi e bienestar general.

E responsabilidad di tur ciudadano ta cuminsa den nan circulo mas cercano cu ta haci cu famia ta e nucleo di un comunidad democratico. Tur estudio lo demostra cu pa Aruba habri caminda pa futuro, e mester recobra e balornan di famia cu a bay perdi.

Derechonan di Hende Muhe a duna e ser femenino na Aruba tur arma pa lucha pa un Aruba a base di e cultura y e balornan propio di e pais. Awe e muhe tin e deber di sali dilanti y exigi di e homber pa hunto nan debolbe Aruba e herment di mas grandi cu ta e balor di famia sano.

Awe mester subi e bandera di respet pa e ser hende, cu a base di balornan di Aruba ta respeta su mes. Awe muhenan mester uni den sosten di e mentalidad sano di Aruba cu ta proteha bida familiar pa e hende di futuro por desaroya den un hogar sano cu ta brinda perspectivanan pa su futuro y futuro di nos pais.

E muchanan cu ta nace como ciudadano di Aruba mester ta capaz pa traha mañan pa Aruba a base di desaroyo di nan talentonan acopla na e mentalidad Arubano.

Awe Aruba mester di homber y muhe pa haci emancipacion di hende muhe bira realidad den union di forsa den famia, den comunidad Arubano como ehempel pa mundo.

- Advertisement -

DUNA COMENTARIO

Please enter your comment!
Please enter your name here