Na e momentonan aki, Aruba ta pasa den un situacion sumamente serio. No por tin un Arubiano legitimo, sincero y honesto, cu no ta realisa e gravedad di e turbulencia local y internacional cu ta afecta Aruba.
Esfuersonan grandi di ciudadanonan cu un curason Arubiano, a haci cu awe ainda turismo por ta base di entrada di famianan den un situacion mundial sumamente serio y peligroso pa turismo y expansion economico.
Como matutino di Aruba, funda dor di Jossy Mansur pa carga y sirbi e interes di su pais Aruba, DIARIO na e momentonan aki mester asumi un posicion contra e manifestacion politico cu AVP ta organisa y pa cual ya e partido ta crea tera fertil .
Awe interes di Aruba ta exigi pa nos lanta para contra tur loke ta un menasa pa nos pais cu nos ta roga Todopoderoso proteha y guia mientras desaroyonan cu nunca Aruba a pensa di mester enfrenta, ta manera nubia scur riba nos cabes.
Cu AVP no por pensa riba e bienestar di Aruba, a keda confirma den e ultimo añanan y ta ser confirma na e momentonan aki.
Na momentonan cu tur Arubiano cu un curason cu ta grita Aruba, ta pone Aruba dilanti, e lider di AVP Mike Eman ta haci bofon di Aruba cu el a malogra y destrui.
Hamas historia di Aruba a conoce e desastre politico cu Eman a wordo crea y cu mester a laga Aruba na suela y pesey pueblo a pone un fin na e gobierno pasado na 2017.
Aruba ta lucha cu tur su forsa pa recupera despues di e gobernacion, cu ta un berguenza pa nos pais.
Awe mester papia di traicion ora e dirigente di AVP ta nenga e asiento den Parlamento manera el a pidi pueblo den un campaña cu el a kere cu lo duna su persona un victoria aplastante despues cu el a destrui futuro di Aruba.
Historia skirbi lo papia pa semper di e forma cu Mike Eman a uza fondonan di Aruba como gobernante di Aruba. E rapport “Bo Aruba” ta den man di autoridad despues di a ser entrega na Gobierno na e aparato maximo di control di pais Aruba, cu ta Algemene Rekenkamer Aruba.
Un rapport cu ta splica cu cifra con placa cu Aruba por a uza pa diversifica su economia, crea trabou duradero, elimina problemanan social di e pais, a ser uza sin responsabilidad y cu riesgo halto pa e pais.
E proyectonan cu a ser otorga a pasa Un Biyon y si no a pone fin na e racha di gobierno di Eman, awe Aruba lo ta yora perdida di mey Biyon mas.
E debe nacional cu a wordo laga atras, no tabata na fabor di pueblo di Aruba cu no por a celebra fiesta riba brug ni sembra cuminda riba Green Corridor.
Awe Aruba ta parti di desaster regional y internacional despues cu e mercado petrolero di Aruba a wordo entrega na dictador Nicolas Maduro y a traiciona tur Arubiano cu promesa falso y mentira tras di mentira.
Awor cu Aruba ta haci esfuerso grandi pa reconstrui e pais cu nan a laga kibra, e ta lanta pueblo y ta crea instabilidad sin tene cuenta cu e interes di Aruba cu e ta sigui traiciona.
E interes di Aruba na e momentonan aki ta pa reconstrui e economia, situacion financiero y social cu a wordo destrui. Aruba mester di trankilidad local pa den e furia cu e problema na Venezuela ta causa den region, scapa loke a resta di economia di Aruba.
Awe na forma categorico a base di e amor pa Aruba y dignidad Arubiano cu a conduci na nacemento di DIARIO, nos ta lanta para contra e traicion pa kibra bienestar di Aruba.
Nos ta rechasa e intentonan pa bin cu manifestacion y intrankilidad cu lo destrui turismo y bienestar.
Nos ta lanta para contra destruccion di Aruba cu kier a hinca nos den un crisis di angustia cu e proposito pa e tin beneficio politico.
