Home Editorial Editorial: Nos Himno y Bandera ta simbolo di gobernacion duradero di Betico...

Editorial: Nos Himno y Bandera ta simbolo di gobernacion duradero di Betico Croes

119
0
SHARE
- Advertisement -

Dia di Himno y Bandera ta ser celebra na un momento importante den nos historia.

Pa comprende e importancia di actua segun exigencia di un momento y no pensa cu mañan lo tin tempo pa coregi, nos mester bolbe na e historia di e Arubiano Betico Croes, cu a ofrece Aruba un historia liber duradero cu awe nos solamente por sigui carga si nos kier mantene e lucha pa bienestar di Aruba.

Betico Croes a presenta na pueblo un caminda pa cana pa yega na libertad berdadero, cu ta hancra den nos amor y respet pa nos pais cu nos mester sirbi y no pidi pa sirbi nos.

Ora Betico Croes tabata lucha pa Aruba, e no a crea un trono pa su mes y rond di su trono, e pueblo di Aruba. El a para den pueblo y a lucha hunto cu pueblo segun un proyecto visibel pa pueblo Arubano. Den e lucha di Betico Croes, Arubianismo tabata simbolisa.

Betico Croes a duna contenido na un pais cu por tabata chikito y simpel, pero respeta pa loke el a logra. E bandera di Aruba cu el a entrega tur generacion di Aruba no tabata ser carga pa documento y palabra y mas palabra.  E himno y bandera di Aruba a ser entrega na su isla cu e pakete di balor y moral Arubano cu Betico mes tabata haci bibo cu su presencia,  su trabou y su entrega total na su pais.

Betico Croes no a presenta proyectonan bashi, fragmenta, basa riba realisacion futuristico. E himno y bandera tabata e plan total pa cana y yega na e momento cu a hisa e bandera di e pais autonomo Aruba.

Betico Croes a logra loke te awe ningun otro Arubiano a logra. Hunto cu pueblo el a cana un trayecto, haciendo uzo di expertonan Arubano riba tur tereno pa enfrenta reino y mundo; skirbi plannan concreto pa e pais Aruba y ehecuta e plannan aki.

Betico Croes tabata un imagen di un Arubiano, cargando e tesoro di mentalidad y balornan Arubano pa logra e interes Arubano.

Den un tempo record, el a entrega Aruba su Himno y Bandera. El a sinta na mesa, rondona di expertonan di Aruba, negocia exigencianan di Aruba y a lanta for di e mesa rondo di negociacion cu resultado y victoria pa Aruba.

Si no tabata pa e crisis di petroleo internacional cu a conduci na fin di Lago y ser uza contra Betico Croes, e lo a bira e persona cu lo a dirigi tambe e realisacion di plannan fundamental pa e pais por a funciona.

Betico Croes tabata simbolo di un gobernacion duradero. E gobernacion democratico di e pais liber di Aruba cu a base di loke a negocia cu Reino a bira realidad, a ser entrega na e gobierno cu mester a tuma mando di e pais dia Prome di Januari 1986.

El a entrega un pais a base di orden di ley, liber, democratico y cla pa funciona na e gobierno cu a forma despues di eleccion 1985. Si no tabata pa e pais organisa cu Betico Croes a laga atras, Status Aparte lo a bira un calamidad gubernamental y lo no por a crea un caminda pa futuro ora crisis petrolero mundial a pone Lago cera su portanan.

Un pais sostenibel, cu un base solido, Betico Croes a laga atras ora e avion a subi cu a bordo e heroe nacional cu tabata den agonia di morto y hamas lo a mira e pais autonomo cu el a lucha pe.

Hamas por separa Betico Croes for di e Himno y Bandera cu ta marca su herencia y awe ta pidi tur Arubiano pa hisa cara y cu orguyo duna respet na e pais pa nos por sigui traha riba rescate di Aruba Dushi Tera.

Dios bendiciona nos pais y su pueblo!

- Advertisement -

DUNA COMENTARIO

Please enter your comment!
Please enter your name here