Home Editorial Editorial: Un siman cu oportunidad di oro pa futuro di Aruba

Editorial: Un siman cu oportunidad di oro pa futuro di Aruba

84
0
SHARE
- Advertisement -

Mientras Aruba tabata prepara siman pasa pa celebra e Dia di Himno y Bandera, DIARIO tabata sigui tur informacion local y internacional pa por a prepara Aruba pa un siman nobo, cu lo ta decisivo pa e pais.

Dos acontecimento importante a tuma luga pa trece cambio riba terenonan di hopi preocupacion pa Aruba.  Minister Presidente Evelyn Wever-Croes a presenta e informacion di su logro pa continuacion di e segundo fase di e refineria. Minister di Husticia Andin Bikker a cumpli cu e helicopter esencial pa vigila nos teritorio. Awe Aruba tin un oportunidad di oro pa trece cambio den e insiguridad cu a domina e pais durante ultimo añanan.

Pa por enfrenta e situacion cu a ser crea dor di e debe nacional, Aruba mester di un economia y situacion financiero cu ta deshaci di incertidumbre y ta crea e posibilidad pa expande nos economia cu proyectonan basa riba factibilidad.

Central den e situacion economico, financiero y social di Aruba ta, pa yega na un conclusion riba e proyecto refineria, cu a ser gescrap for di cifranan oficial di e pais y den relatonan di instancianan cu mester haci pronostico y duna guia riba nos maneho manera Banco Central.

Na 2018 practicamente tur instancia na Aruba cu ta acepta nan responsabilidad, a expresa nan temor pa e proyecto refineria cu a ser firma cu Nicolas Maduro y a bira controversia local y internacional.

Gobierno actual a hereda un proyecto paralisa.  Supervision Hulandes a exigi prome cu cambio di Gobierno na 2017 pa deshaci di e proyecto den e cifranan oficial di e pais pa evita cu Aruba ta ser goberna cu cifra incorecto.

Minister Presidente Evelyn Wever Croes, a percura cu porfin Parlamento por a tuma nota di e acuerdo cu gobierno anterior a firma na nomber di Aruba cu Nicolas Maduro. Tambe el a exigi Citgo cu tabata den man di Nicolas Maduro pa bin splica kico ta pasa. Lamentablemente promesa falso a ser haci na Aruba atrobe.

Den e tempo aki DIARIO a considera necesario pa profundisa mas y mas den e realidad di Citgo y a habri tur su canalnan periodistico internacional y local pa cumpli cu su tarea periodistico enfrente e pueblo di Aruba.

Hopi informacion cu nos a trece cu prueba, tabata parce increibel.  Como matutino di Aruba, mester a habri wowo di e comunidad pa loke por a pasa y a pasa.

Merca y Union Europeo a cuminsa actua mas severo contra Venezuela, cu a produci un situacion desastroso cu a afecta Aruba. Citgo mester a cera su porta y manda hende cas.

Cu entrada di Presidente Interino Presidente Juan Guaido un porta nobo a habri y mester aplaudi e forma cu Minister Presidente Evelyn Wever-Croes a actua cu su acercamento na Merca, cu siman pasa a tuma e decision cu a haci posibel pa Citgo sigui existi na Merca y na Aruba.

DIARIO den antesala di Himno y Bandera a splica Aruba diasabra na forma di primicia cu Merca a habri e posibilidad pa scapa e negoshi di combustibel na Aruba.  A base di e decision di Merca, e peticion di Minister Presidente di nos pais a ser honra y e segundo fase di e proyecto refineria lo ser realisa.

Di e forma aki Aruba a haya e oportunidad di oro pa revisa e contracto, permiti expertonan y instancianan oficial di nos pais duna siguransa cu e refineria lo sirbi interes di Aruba riba termino corto y largo.

E fin di siman tras di lomba a trece aliento pa Aruba na entrada di un siman decisivo pa nos economia pero tambe nos siguridad nacional y individual. Den e cuadro aki mester elogia tambe e trabou di nos Minister di Husticia, Andin Bikker, cu introduccion di e helicopter.

Aruba a celebra un bunita dia di Himno y Bandera. Laga nos uni den esfuerso pa duna lo miho di nos mes den e siman decisivo riba tereno local y internacional pa Aruba. Bista di mundo ta fiha riba Aruba. Ban demostra mundo nos capacidad y grandeza.

 

- Advertisement -

DUNA COMENTARIO

Please enter your comment!
Please enter your name here