ORANJESTAD (AAN) – Sra. Filomena Sofia tambe a conta nos redaccion un tiki storia tocante e tanki di awa cu tin na Rancho, for di aña 1905.
El a conta cu su mama, su wela y bisawela a lanta na Rancho y nan tur a haya e tanki ey caba. E ta un tanki cu tin masha aña bieu, e dama a comenta.
Tambe el a comenta cu su mama a haye cu awa, pero e mes y siguiente generacionnan no. E ta corda cu tempo cu e Portuguesnan tabata bari e caminda, nan tur tabata bin tira e sushi eybao anto DOW tabata bin cu un truck pa lanta e sushi.
Un anecdota cu sra. Sofia a trece dilanti ta con dushi e cu su amiganan tabata hunga di tienda, na Rancho, usando bleki bashi y nan tabata hunta piedra chikito y cu esey nan tabata paga.
E tabata un lugar hopi dushi pa biba, pero lamentablemente awendia, e bario a cambia completamente. Su mama a conte cu tin hende tabata bin yena e tanki pa nan laba paña y esaki ta un tanki cu mester wordo conserva como historia y e ta un monumento hopi valioso.
