Minister Bikker:
ORANJESTAD (AAN) — Otro siman tambe lo anuncia den medionan di comunicacion e “Request for expressions of interes” cu ta e prome stap cu ta wordo duna pa yega na un Instituto Coreccional nobo (KIA).
Asina Minister Bikker a menciona den conferencia di prensa di gobierno, na unda el a reitera cu e estado di e facilidad actual ta laga di desea y pa hopi aña no tin mantencion adecua. E edificio tin su edad caba, kiermen un construccion di mas cu 30 aña bieu.
Un di e aspectonan central di Ministerio di Husticia ta yega na un plan total pa un KIA nobo, locual no ta facil pasobra e retonan financiero di nos pais ta hopi grandi, mientras cu e magnitud di e inversion aki, door di e situacion financiero deplorable cu e gobierno a hereda di su antecesor, ta un reto hopi grandi pa logra esaki.
No obstante, e dignatario a bin cu conceptonan nobo cu den Request for Expressions for Interes, tin un concepto cu yama “Perpetuals” cu ta un tipo di bon of “hybrid financieren”.
El a splica esaki bisando cu normalmente ora di bay den e mercado financiero ta paga interes y ta paga riba e fianza. Den e sistema “Perpetuals” mayoria di biaha ta paga un interes garantiza, y ta mas tanto un share cu un bon.
Mirando e retonan financiero di nos pais, den e concepto aki, segun e dignatario, gobierno bay pidi RFI pa wak si den e mercado tin apetit pa interes pa e financiamento aki. E ta spera cu e ta posible pasobra riba mercado tin hopi fondo di pension cu no tin hopi caminda pa aloca nan pa motibo cu no mag di inverti mas di 40% den exterior y 60% den e mercado domestico.
E mandatario ta spera cu lo tin pa yega na e financiamento rekeri pa e facilidad aki.
Mirando cu Hulanda cada bez mas ta realiza cu e responsabilidad pa tin facilidadnan coreccional den forma optimal, ta un responsabilidad mutuo, gobierno lo manda e documentacion pa Hulanda pa wak di ki manera nan tambe por yuda, kizas parcialmente.
Minister di Husticia a reitera cu gobierno ta trahando optimalmente y nan a logra caba e radar y otro siman, Dios mediante, e helicopter y tin tur atencion pa un KIA nobo. Nan ta trahando cu pasonan firme pa logra tur e proyectonan aki.
