Segun autopsia, el a hinke varios biaha cu un cuchio
NICEVILLE, Fla/ ORANJESTAD (AAN): Un otro noticia tristo cu a drenta den weekend ta esun cu ta indica cu na Okaloosa Country Merca, un criatura di apenas 3 aña a wordo haya morto despues cu su tata, cu ta un arubiano identifica como Frederick Franken di 61 aña, a ocasiona su morto door di hinke varios biaha. Esey e autopsia haci dialuna a revela.
Segun e canal di television local WEARTV, dialuna e autopsia a wordo realiza door di e ‘Medical Examiner’s Office’ despues cu diabierna, e mama di e criatura, Darrelly van Dieren, tambe arubiano den servicio militar na Merca, a yega cas y a haya su yiu homber, Frederick Franken Jr, morto banda di e tata, cu tambe tabata herida door a hinca su mes.
E incidente aki a sosode na Rawlins Court Home y eynan mes e criatura a wordo declara morto ora cu autoridad y e paremediconan a yega na e sitio.
Segun WEARTV, dialuna, e condicion di Franken tabata stabil. El a usa un cuchio di corta carni pa comete e crimen aki. E arma a wordo localiza na e residencia.
Van Dieren a conta e investigadornan cu e pareha tabata confrontando problemanan matrimonial y cu recientemente el a pidi su casa pa nan divorcia.
Extra informe cu DIARIO a haya ta cu Franken y van Dieren a bay biba na Merca. Tur cos ta mustra cu ta trata akinan di un caso di violencia domestico cu a haya un final hamas desea.
E bisiñanan a expresa cu nan tabata den shock pasobra nan tabata considera e famia Franken como “Nice people” y leu leu nan tabata mira e yiu homber algun biaha sali hunga pafo di e cas.
DIARIO ta expresa palabranan di profundo pesame na e famia y conocirnan.
Potretnan: WEARTV
