Home Hudicial Homber condena na 3 aña di prison pa atraco cu violencia riba...

Homber condena na 3 aña di prison pa atraco cu violencia riba un homber

82
0
SHARE
- Advertisement -

ORANJESTAD (AAN) – E homber J.K.(22) ayera mainta a scucha Hues bisa cu e ta culpable di a haci un atraco cu violencia riba un homber y tambe cu e ta culpable di posecion di un arma di candela. Fiscal a exigi 4 aña di prison, Hues a condena J.K. na 3 aña di prison.

Tratamento di e caso aki a sosode na Februari 2019 caminda Fiscal a acusa J.K.(22) di ladronicia cu violencia y posecion di arma di candela riba 31 Maart 2018 riba homber D.L.D. J.K. a menaza e homber cu un arma di candela y despues dal’e un mokete benta abou y bay cu su cellular.  Tambe e ta wordo acusa cu riba 29 April 2018 e tabatin arma di candela.

ATRACO

Hues a mustra cu tin denuncia di D.L.D. cu e tabata na pia, un auto a para, un homber a baha, dal’e mokete den cara y bay cu cellular. Despues el a haya mensahe via facebook for di e homber J. cu e tin su cedula. J.K. a bisa cu J. a bende e, e cellular. J.K. a duna su amiga T. e cellular.

Hues a bisa cu J. a wordo interoga. El a bisa cu J.K. tabata cun’e y a puntra kende lo por activa cellular. Den e tas di cellular J. a haya e cedula. Segun J., J.K. a bisa cu el a haci atraco. Un otro persona tambe a bisa cu J.K. a bisa cu el a haci atraco y coy un cellular.

Hues a puntra J.K. kende ta desmenti di a haci atraco cu violencia, di con nan a declara contra dje. El a bisa cu por ta nan tin algo contra dje. Segun J.K. e no mester haci atraco pasobra e ta traha. Hues a remarca cu e victima D.L.D. tambe ta reconoce J.K. riba facebook di biaha como esun cu a atak’e. Segun J.K. por ta J. lo a bis’e cu ta J.K. Hues mustra J.K. e potret riba facebook cual el a admiti cu ta su potret.

Huesa  bisa cu CID a haya tip cu J.K. lo tin un arma scondi pafor di su cas bou di un mata. A haya un pistol Cal. 38 cu balanan. Segun J.K. e no sa di esey. El a bisa Hues cu Polis a haci investigacion na su cas y no a haya nada. Hues a bisa cu a haya un airsoft gun. J.K. a bisa cu esey ta di su tata y a hay’e den su tata su camber.

Despues di 10 dia sera, a haya e pistol. E ta kere cu ta un set up contra dje. Ta asina cu a tuma muestra di DNA y nada. Fiscal a bisa cu e persona encarga a tarda pa manda e DNA pa NFI na Hulanda.

Hues a mustra cu na 2015, J.K. a wordo condena pa ladronicia cu violencia y a haya castigo hubenil.

J.K. a mustra Hues cu ta cambiando su bida. El a bisa cu e ta siguiendo estudio y a mustra documentonan. 

EXIGENCIA DI FISCAL

Fiscal a bisa cu e ta haya cu e arma cu a haya den mondi banda di cas unda J.K. ta biba, no por prueba cu e arma ta di J.K. y a pidi pa declara J.K. liber pa esaki. Pa loke ta e airsoft gun, a haya esaki den camber di e tata, no por prueba esey tampoco y a pidi Hues pa declara J.K. liber. Pa loke ta e atraco cu violencia si haya proba. Tin declaracion di e victima cu a reconoce J.K. riba facebook. Fiscal a menciona e otro testigonan cu a bisa cu J.K. a bisa nan cu el a atraca un homber.

E lo a expresa: “mi a corona. Kende por habri un cell?” Fiscal a bisa cu e no ta kere e storia cu J.K. no a haci’e. Fiscal a bisa Hues cu atraco cu violencia ta causa inseguridad. Pa cu e castigo, Fiscal a tene cuenta cu awor J.K. ta studiando. Fiscal a mustra cu anterior, tempo cu J.K. tabata mucha, el a haya castigo hubenil.

Awor si e ta adulto y por impone castigo pa adulto. Segun ley, e castigo ta 4 aña di prison pa un atraco arma. Fiscal a cuestiona e actitud di J.K. cu no kier para responsabel pa loke el a haci. El a exigi 4 aña di prison, kitando e tempo cu e ta sera den KIA. 

DEFENSA ABOGADO

Abogado mr. Kock a bisa Hues cu J.K. ta para riba cu e no a haci atraco arma riba un persona. E mes a persisti pa duna DNA pa e demostra cu e arma cu a haya banda di su cas no ta di dje. Pa loke ta sospecho di atraco arma, na opinion di e abogado, e unico motibo cu J.K. ta sera ta pasobra cu el a cumpra cellular pa 300 florin for di un tal J.

E abogado a bisa Hues cu e ta haya e declaracionnan contra su cliente contradictorio. E abogado a mustra cu e victima mes a duna descripcion con e atracador tabatin arma den man drechi y cu su man drechi a dal’e. Tambe e victima a bisa cu e atracador a subi den un Toyota Tercel color blauw. E no a reconoce e atracador.

Despues e ta bisa cu e lo a mira e atracador un caminda. Cinco dia despues e victima ta bisa cu e auto tabata un Suzuki blauw y no un Toyota. J. a acerca e victima via facebook pa e victima haya su cedula. E abogado ta haya cu J. a influencia e victima cu ta J.K. ta esun cu a haci atraco.

J. tabata envolvi den e atraco y a tira culpa riba J.K. cu a cumpra e cellular for di dje.    E abogado a señala cu J. a wordo haya cu un bala Cal. 38 cu ta cuadra cu e pistol cu un persona anonimo a bisa Polis tabata scondi den mondi banda cas di J.K.

E abogado ta haya straño cu e victima no tin ningun marca di maltrato na su cara siendo cu e ta bisa cu e atracador a dal’e cu e arma den su cara. Segun e abogado, ta J. so ta bisa cu J.K. lo tabatin un arma. E otronan ta bisa cu nan a tende cu J.K. tabatin un arma. Ta papia cu e sospechoso lo a bay den un auto pero ta su so ta wordo persigui y esnan den auto no. E abogado ta kere cu aki ta un set up di parti di J. contra J.K. E ta haya cu mester declara J.K. liber di e acusacion di atraco cu violencia. 

SENTENCIA

Ayera mainta Hues a bisa cu e ta haya J.K. culpable di a haci e atraco cu violencia. E no ta haya prueba e acusacionnan di arma di candela. Hues a tene cuenta cu anterior J.K. a wordo condena caba. Tambe a tene cuenta cu J.K. kier cambia su bida y e ta hoben. E revolver cu balanan tambe e pistol di aire lo wordo destrui. Hues a condena J.K. na 3 aña di prison.

 

- Advertisement -

DUNA COMENTARIO

Please enter your comment!
Please enter your name here