Home Hudicial Homber ta mishi cu un dama y maltrate y tambe ta maltrata...

Homber ta mishi cu un dama y maltrate y tambe ta maltrata su mesun mama

156
0
SHARE
????????????????????????????????????
- Advertisement -

ORANJESTAD (AAN): E homber di inicial L. di 25 aña di edad, riba Diahuebs mainta a presenta dilanti Hues pa duna cuenta di un serie di maltrato cu el a haci. En total ta 4 caso di maltrato, entre nan dos biaha el a maltrata su mesun mama.

Tambe e mester a duna cuenta pa un caso caminda el a mishi cu un dama y despues cu a dama a reacciona dal’e un wanta, el a dal e dama.

Aunke cu L. tabata blo nenga di a maltrata, Fiscal a hay’e culpable y a exigi un castigo combina. Hues tabata preocupa pa cu e actitud di L. Sinembargo el a haya e castigo exigi pa Fiscal na su lugar y a confirma esaki.

    ACUSACIONNAN:

E acusacionnan cu Fiscal a presenta ta:  (*) Dia 19 Januari 2018, L. a mishi cu un dama su bil y a dal’e na su cara.  (*) Dia 16 di Maart el a maltrata e partner di su mama y su mama.  (*) Dia 22 Juli 2017 el a maltrata su mama.

   MISHI CU DAMA:

Hues a puntra L. kico e tin di bisa riba e caso di a mishi cu un dama. Segun L., e no a mishi cu e dama y tampoco a dal’e. Segun L. e dama a purba dal’e den su cara y el a kita su man.

Hues a mustra cu e dama P. a bisa cu e tabata hunto cu e ruman homber di L. y L. den un auto y ora el a sali for di auto, L. a kinipi su bil y el a dal’e un wanta. Segun e dama P., e momento ey L. a dal’e na cara. Hues a mustra cu na Polis, L. a bisa cu el a pusha e dama y por ta cu e momento ey el a mishi cu su cara. L. ta keda bisa Hues cu e no a haci nada.

Hues a mustra cu e ruman homber di L. a bisa cu L. sa usa droga y ora e haci esey e ta bira fastioso. L. a bisa cu su ruman ta gaña.

   MALTRATO:

Hues a mustra e maltrato di K. cu ta e partner di mama di L., y e mama di L. Segun L. e cos ey a pasa pero e no a maltrata. El a bisa cu el a pusha. Hues a mustra cu e mama a bisa cu L. a dal’e den cara y K. tambe a bisa cu L. a dal’e. Segun L. el a djis pusha.

Hues a mustra cu 22 Juli 2017, L. a maltrata su mama. Hues a puntra L. di esaki y el a bisa cu e no ta corda. El a bisa Hues cu nunca el a dal su mama. Hues a mustra cu esaki a sosode den Wilhelminastraat caminda un patruya di Polis net tabata pasando y a mira un homber dal un muher wanta den cara. Nan a actua y detene L. A resulta cu e dama ta e mama di L. E mama a bisa Polis cu L. a dal’e den cara.

Hues a mustra cu na 2010, L. a worde condena pa maltrato y na 2015 pa maltrato severo.

Hues a haci L. un serie di preguntanan y na dado momento el a bisa cu e ta preocupa pa cu e actitud di L. Actualmente L. no ta trahando y ta bibando cerca su mama. Hues a bisa cu e mama a declara cu L. mentalmente no ta stabil y cu el a busca ayudo na diferente instancia pero nada.

   EXIGENCIA DI FISCAL:

Fiscal a bisa Hues cu e ta haya legalmente proba e acusacionnan. Fiscal a mustra cu L. ta bisa cu e no a haci nada, pero tin testigo cu a declara na Polis cu L. a haci’e. Entre otro Polis mes a mira con L. a dal su mama. E mama a bisa cu ta berdad cu su yiu a maltrat’e y e kier ayudo pa su yiu cu no ta mucho bon di cabez. Fiscal a mustra cu tin dos sentencia caba.

Na opinion di Fiscal, tin 4 caso di maltrato y un caso di mishi cu un dama. Fiscal tin miedo cu L. ta blo nenga y cu e situacion lo bay bira mas serio. Fiscal a dicidi di duna L. e ultimo chens aunke cu Fiscal ta haya cu L. no merece esey. El a bisa cu e ta bay exigi castigo combina y bou guia Reclasering. Si L. no bay Reclasering, e lo bay cera.

Fiscal a exigi 120 ora di trabao pa comunidad of 60 dia sera. 3 luna di prison condicional y 2 aña prueba y cu obligatoriamente L. mester cay bou guia di Reclasering.

E abogadonan a referi na decision di Hues.

   SENTENCIA:

Hues ta haya tur e acusacionnan legalmente proba. Hues a bisa cu e ta completamente di acuerdo cu Fiscal cu casonan asina mester di castigo di prison pero kier duna un chens.

Mirando cu a pasa un aña cu nada a pasa, Hues ta haya cu e chens ta na su lugar.

Hues ta haya cu L. mester di guia di Reclasering. Hues a confirma exigencia di Fiscal y a condena L. na 120 ora di trabao y si e no haci’e, e mester bay 60 dia sera. Tambe Hues a condena L. na 3 luna di prison condicional cu un tempo di prueba di 2 aña y bou guia di Reclasering.

 

- Advertisement -

DUNA COMENTARIO

Please enter your comment!
Please enter your name here