Ricky Hoek:
ORANJESTAD (AAN): Universidad di Aruba a yama un rueda di prensa pa asina duna di conoce algun detaye relaciona cu nan proximo actividadnan.
Ricky Hoek, Professional & Society Coordinator na Universidad di Aruba pa e Opleiding di Social Work & Development.
El a anuncia e inicio di e ‘Luna di Trabao Social’ mirando cu tur trahador ta pone enfasis riba e dia aki.
Dia 19 di Maart lo ta e dia internacional caminda rond mundo, tanto e federacionnan y instancianan internacional ta pone atencion na e importancia di trabao social globalmente, a bisa.
Aruba no ta e excepcion y pa di dos biaha den colaboracion cu Departamento di Asuntonan Social ta enfoca e tema aki poniendo importancia na e trahadornan social local.
E tema anual di e aña aki ta “Promoviendo e importancia di e relacionnan humano”. Esaki, a indica, ta hopi importante pa Universidad di Aruba mirando cu Gobierno di Aruba a proclama “Aña di Famia”.
Den cuadro di esaki, nan ta kere cu e tema mundial y e tema local di Gobierno di Aruba ta cera bon cu otro y pesey kier pone enfasis ariba e relacionnan entre departamentonan, institucionnan, famia y tur hende den comunidad, Hoek a manifesta.
Esaki ta e di 10 aña di e opleiding di “Social Work & Development’. Nan ta mira e alumnonan cu a gradua y nan ta haciendo un bon trabao den comunidad como trahador social, a señala.
Segun Hoek, nan enfasis e aña aki ta ariba e “codigo di etica” pa traha asina e base pa e trahadornan social mester pa por eherce nan trabao, na un manera mas profesional y mas responsabel.
ACTIVIDADNAN
Genesis Toloza, studiante di e di dos aña di e opleiding a referi na e actividadnan cu lo tin den e dianan. El a bisa cu dia 8 di Maart lo ta enfocando ariba e “Social Work Awareness Week”. E siman aki lo tin trahadornan social exponiendo nan experiencia pa asina inspira mas e personanan pa sigui e estudio aki.
Ariba siman di 15 y 16 di Maart lo pone focus ariba boluntariado. Esaki nan lo haci hunto cu Aruba Doet.
Dia 22 di maart, a indica, lo tin e celebracion di Dia di Trabao Social cu lo tuma lugar na Universidad di Aruba, na e aula di lecturanan. Esaki lo ta di 8 am te 12 pm. E dia aki lo papia di e codigo di etica di e profesionalnan y lo mezcla esaki cu varios workshop, tanto cu studiantenan como cu esnan interesa.
Ariba e ultimo dia cu ta 29 di Maart, ta bay tin un ‘happy hour’. Di 5 pm te 7 pm na Mi Dudu Bar Restaurant. Durante di esaki lo comparti experiencianan y lo duna feedback di loke a experencia den henter e luna, Toloza e duna di conoce.
