Glenda Hernandez, Directora di DAS
ORANJESTAD (AAN): Directora di Departamento di Asuntonan Social, Glenda Hernandez ta contento di ta parti di e dia di e apertura di e ‘Luna di Trabao Social’ cual a tuma lugar na Universidad di Aruba.
El a duna di conoce cu como instancia, nan tin un team bon ekipa na Asunto Social. El a remarca cu e reto ta hopi grandi. Nan ta deal cu hopi problema diariamente. Aworaki e reto ta pa bay mas cerca di e hendenan den cuadro di “Aña di Famia”.
Kier trece e trahadornan social un tiki mas cerca di cas di hende, haci bishita, bay wak kico nan tin mester y den kico por yuda nan, pa yuda nan, Hernandez a declara.
Tambe lo cuminza cu e ‘school approach’ unda cu den un proyecto piloto lo cuminza cu 4 scol basico y kleuter. Nan lo wak kico ta e problemanan social di e scol ey y sorto di retonan tin. Lo bishita e famianan tambe di e alumnonan pa wak con por yuda nan, a bisa.
Pa esaki lo tin colaboracion di diferente departamento, manera Polis, Fundacion Guia Mi, Casa Cuna, etc.
A indica cu mas y mas trahador social ta trahando den diferente area den cuadro di e Social Crisis Plan. Tin trahadornan social cu ta yuda un famia den forma intensivo, cu no ta funcionando adecua.
Kier enfatiza cu e trabao aki ta un trabao hopi pisa. “Bo mester por stima hende. Si bo no ta stima hende, e no ta logra, pasobra, si bo no tin cariño pa hende, pa yuda hende, genuinamente e no ta yuda”, Glenda Hernandez a subraya.
Banda di esaki el a bisa cu ta un echo cu mester di mas trahador social di sexo masculino. Mester por tin un balanza y ora cosnan ta sosode na un cas, tambe por sosode cu e trahador social masculino por papia mihor cu e tata.
Den esaki tambe ta bay haya un trahador social cu ta traha na Mediacion. Ora cu tin problema den famia pa cu divorcio, e ta bay yuda, por ehempel, a indica.
