ORANJESTAD (AAN): Aruba a bira moderno, y DIARIO ta orguyoso pa mira cu varios Scol di MAVO riba e isla (principalmente scolnan di Gobierno), a probecha di e hecho cu tur alumno tin un Smartphone awendia, y nan ta combina esaki durante dunamento di les.
DIARIO ta na altura cu varios scol na MAVO, ta completamente di acuerdo cu studiantenan ta usa nan smartphone durante les den klas. Nan ta usa internet pa look-up diferente tarea eynan mes cu nan docente, y e ta demostra cu hopi scol na Aruba ta rumbo pa un mihor futuro.
Pero Diabierna a sali na cla, cu no ta tur scol ta di mesun opinion. Algun hasta a keda cu estilo di ta prohibi estrictamente uso di smartphone na scol.
Mientras otro scolnan ta OK cu duna alumnonan di MAVO les cu smartphone… na Maria College MAVO na Playa esey parce di ta prohibi, y docente por hasta tuma e alumno su celular den beslag.
Esey ta e motibo pakico Diabierna mainta un mayor a presenta na Maria College pa reclama un asunto unda cu docente a tuma beslag di e celular un dia prome. E mayor a mustra cu e celular ta costa placa, y tambe abono mensual pa data y yamada, y pesey ta importante pa e tin contacto cu su yiu.
Pa colmo ora cu a yega na cabezante di Maria College, nan no kier a entrega e celular confisca tampoco. Esaki por hasta wordo considera den ley di Aruba como “ladronicia”, y pesey e mayor a yama Polis.
Sinembargo cabezante di scol a splica, cu tempo cu e alumno a inscribi, a firma un supuesto papel cu ta encera un acuerdo, cu e scol lo tuma beslag pa 1 siman largo di e celular.
Pues pa 1 siman largo, e alumno no por comunica cu su mayornan, y no por usa e aparato pa por haci su huiswerk tampoco. Y ora scol caba, e no por manda message pa su mayornan tampoco pa pidi nan buske.
E mayor a bisa cu e lo bay reclama na SKOA riba loke ta pasando aki. Ta increible cu otro scolnan progresivo na Aruba si ta ‘embrace’ na forma mahestuoso e uso di smartphone den klas pa varios vak, hasta Wiskunde y Scheikunde, pero otro scolnan si ta keda pega den sistema ouderwets.
