Home Gobierno Minister di Husticia ta desmenti informacion cu detenidonan na Guarda Nos Costa...

Minister di Husticia ta desmenti informacion cu detenidonan na Guarda Nos Costa ta haya un pan pa dia

124
0
SHARE
- Advertisement -

ORANJESTAD (AAN) —  Minister di Husticia, mr. Andin Bikker a reacciona tocante un articulo cu a wordo publica den prensa, cual el a haya necesario pa coregi di biaha. Asina e mandatario a expresa.

El a referi na un informacion cu ta indica cu e personanan deteni pa wordo deporta, cu ta den e facilidad di Garda Nos Costa (GNC), ta haya un pan pa dia.

E mandatario a refuta esaki bisando cu gobierno ta gasta un average di 275 florin pa dia pa cada persona cu ta deteni den e facilidad di GNC.

E personanan deteni ta haya cuminda di catering manera mester ta, traha profesionalmente y pesey e ta lamenta e tipo di articulo cu ta bisa cu cada detenido ta haya un pan pa dia. E ta considera cu esaki na lugar di informacion ta desinformacion.

El a reacciona mesora pa evita cu e noticia aki haya un bida y causa cu Aruba internacionalmente ta wordo mal mira, loke ta ocasiona daño directamente na nos pais, comosifuera cu e detenidonan pendiente di deportacion ta haya un mal trato.

Apart di e cuminda gobierno tin cu cumpra pasashi pa manda nan bek nan pais. Hopi gasto ta wordo haci y nan derechonan ta wordo respeta, entre otro cu nan ta come un bon cuminda, dignatario a subraya.

Minister Bikker a haci un yamada na prensa pa prome cu algo wordo publica, pensa riba e nomber di Pais Aruba, pa ta sigur cu loke ta wordo divulga tin veracidad. E minister a enfatiza cu “e cuenta cu nan ta haya un pida pan pa dia, no ta berdad”!

E dignatario a expresa tambe cu Ministerio di Husticia ta keda para tras di e trabao di cada un di e miembronan di WNC, cu bao circumstancianan hopi dificil y sin precedente, ta pasando di algo cu, historicamente, ningun persona por a pensa den e situacion cu ta afectando nos Isla, unda cu nos pais ruman Venezuela ta pasando den dje y nunca Aruba a haya tanto aplicacion pa asilo politico y ayudo humanitario, y hopi di nan ta bin busca pa drecha nan situacion economico, y Aruba mester mantene e orden.

Tin hendenan cu no ta keda contento cu e control ta wordo haci, pero e mester ta hopi severo pasobra ta 115 mil habitante nos pais tin, cu un infrastructura limita, y mester garantiza e seguridad akinan.

Ta comprendible e situacion di nos pais bisiña Venezuela, pero Aruba no por adopta e problemanan di tur pais rond di nos.

 

 

- Advertisement -

DUNA COMENTARIO

Please enter your comment!
Please enter your name here