ORANJESTAD (AAN) — Na Departamento di Agricultura, Cria y Pesca (LVV- Santa Rosa), a tuma lugar un conferencia di prensa, hunto cu Minister di Transporte, Comunicacion y Sector Primario, sr. Chris Romero, den cual a anuncia un proyecto di plantacion, cu nan ta bay desaroya conhuntamente pa alumnonan di scol basico.
E dignatario a splica: “E proyecto aki ta basa riba e importancia cu nos kier crea den nos hobennan, tocante seguridad alimenticio (food safety)”, e mandatario a relata.
El a referi na e ciere di frontera cu Venezuela algun luna pasa y aworaki atrobe, cu ta trece problema pa Aruba haya cierto alimentonan for di exterior.
A base di e situacion aki, tin den planning un manera pa haci pa den futuro nos pais ta mihor para, si algo asina mester sosode atrobe, segun Minister Romero.
E proyecto aki ta pa concientiza nos hobennan, cuminzando na scol basico, unda ta bay stimula nan pa bin cu nan propio cosecha. E por ta matanan local manera fruta, etc. Pero ta keda na nan escogencia kico nan ta desea di produci.
“E idea ta pa asina aki, for di jong caba, den scolnan involucra nos hobennan cu esaki. Manera mi a yega di bisa caba hunto cu Minister di Enseñanza, nos kier hinca esaki den un curriculum. Cu otro palabra, asina ey for di edadnan hopi jong nan sa caba kico ta e importancia pa por provee y cosecha nan propio alimentacion”, e dignatario a expresa.
El a agrega cu e idea ta pa haci esaki tur aña, unda cu e ganadornan ta wordo scogi y e lo fungi como un proyecto piloto pa desaroya diferente proyecto mas. Prome cu pasa e palabra pa sra. Nathalie Maduro, director di LVV, e minister a gradici esnan presente cu a mira e importancia di e proyecto aki.
