Home Gobierno Minister Ruiz Maduro ta na New York pa reuni cu e agencianan...

Minister Ruiz Maduro ta na New York pa reuni cu e agencianan di rating Fitch y Standard and Poor’s

56
0
SHARE
- Advertisement -

ORANJESTAD (AAN) – Desde cu Gabinete Wever-Croes a yega na mando a cuminsa traha na un manera diligente pa por recobra e credibilidad financiero di nos Pais cu a bay perdi den e 8 añanan cu e gobernacion anterior a keda na mando di nos Pais.

Debi na e mal maneho financiero di Gabinete Eman, e rating di nos Pais a conoce bahada y nos a perde credibilidad financiero como Pais cerca e agencia di rating Fitch y Standard and Poor’s cu ta evalua nos Pais locual ta atacha e bon nomber cu semper Aruba a conta cune.

Pa recupera e credibilidad financiero perdi, Gabinete Wever-Croes a traha riba un Memorando Financiero Economico den cual nos a indica e caminda cu nos lo cana pa por haci nos finanzas publico manehabel y incentiva nos economia.

E plan aki a wordo adopta pa Parlamento y esaki a wordo presenta tambe na Hulanda den cuadro di e supervicion financiero y a sirbi como base pa sera un Protocol cu Hulanda cual ta trece e trankilidad necesario den Reino pa por goberna nos Pais. E ta un plan realistico cu ta indica con Aruba lo traha pa baha, entre otro, e Megadebe cu Eman a laga Aruba cune.

Debi cu Aruba pa largo tempo no a conta cu cifranan confiabel pa sa exactamente con nos ta para financieramente, na inicio di nos encargo como Minister di Finanzas, nos a inverti den Oficina Central di Estadistica y awe Aruba por conta cu cifranan di e Cuenta Nacional 2013-2017 cual ta brinda un bista exacto di e situacion financiero y economico di nos Pais. E ehercicio aki ta brinda transparencia y credibilidad financiero pa nos Pais.

Awor Banco Central tambe tin cifranan aserta pa por haci nan pronosticonan y Departamento Economico di nos Pais por calcula e efecto di proyectonan pa nos economia via e modelo MARUBA. Tur e informacion aki ta valioso pa Gobierno ora di toma di decicion y ta brinda inversionista informacion importante y confiabel cu ta sigura nan inversion.

Banda di esaki Gabinete Wever-Croes a sali foi punto di bista presupuestario cu un crecemento economico prudente y ta traha pa baha gasto di gobernacion y dentro di esaki ta bahando gasto di personal y bahando e deficit pa por mitiga e gastonan halto di personal y interes, cual ta e dos gastonan mas grandi cu ta pisa den Aruba su presupuesto. Esakinan ta pasonan concreto cu ta wordo tuma y cu ta yuda pa recobra credibilidad financiero serca agencia di rating y hunto cune serca inversionista riba e mercado financiero local y internacional.

E siman aki e mandatario encarga cu Finansas y Economia lo ta na New York pa asina reuni cu e agencianan di rating Fitch y Standard and Poor’s pa asina discuti riba e pasonan concreto cu Gabinete Wever-Croes  ta tumando pa atende cu e situacion financiero y economico di nos Pais.

“Nos ta haciendo como Pais esfuersonan grandi pa por stabilisa e situacion y nos tin un caminda realistico stipula pa cana pa por recobra credibilidad financiero pa Aruba. Esnan cu awe ta critica y kier purba na bagatalisa e esfuersonan cu nos ta haci, ta hustamente esnan cu a percura pa cu nan mal maneho y nan complaciencia periodistico atacha Aruba su bon nomber. Nos ta scohe pa drecha y ta convenci cu nos esfuersonan lo conduci na un mihor rating pa nos Pais” tabata palabranan di nos Minister di Finanzas Xiomara Ruiz-Maduro.

 

- Advertisement -

DUNA COMENTARIO

Please enter your comment!
Please enter your name here