Nacionnan Uni: e derechonan humano di holocaust pa holocaust

    157
    0
    SHARE
    - Advertisement -

    Analisis 

    E buskeda di paz no ta algo di nos tempo moderno. Cu avance di civilisacion, paisnan a trata di coopera riba diferente tereno. Paz tabata e soño mas dificil pa alcansa. Pa por tin paz mester di husticia. Paz mundial ta exigi cu mundo ta capaz pa uni pa condena loke ta malo y sostene loke ta bon. Riba peticion di Nicolas Maduro, dialuna 11 di maart un delegacion di Derecho Humano ta cuminsa cu un bishita na Venezuela. Motibo pa awe DIARIO analisa e motibo di existencia di Nacionnan Uni y su resultadonan di matansa pa matansa. Por papia di derecho humano cu ta base di Nacionnan Uni? 

    Despues cu Siglo21 a habri cu kiebra di derechonan humano na Venezuela, awe Nacionnan Uni ta yega pa dicidi riba e situacion na Venezuela.

    Venezuela a bira uno di e hopi paisnan na mundo cu ta haci necesario pa lansa e pregunta, kico ta e tarea y validez di Nacionnan Uni.

    Guera Mundial e prome fracaso di intento pa uni nacionnan  

    Na 1899 mundo a tuma su prome paso pa na forma pacifico alcansa paz. A tene e conferencia internacional di paz, cu a resulta den un acuerdo y introduccion di e Palacio di Paz na Den Haag, Hulanda na 1902.

    Mundo a sigui busca union y a yega na e Liga di Nacionnan cu a ser estableci despues di Prome Guera Mundial. E tabata hancra den e Tratado di Versailles, cu mester a promove cooperacion internacional pa alcansa paz y siguridad.

    E Organisacion Internacional di Labor cu tambe a ser institui a keda na bida. E Liga di Nacionnan a muri cu inicio di Segundo Guera Mundial.

    E holocaust di e socialista Adolf Hitler no a respeta derecho humano, pero a trapa riba tur balor sagrado di hende mescos cu Mussolini na Italia.

    Mundo no a conoce paz pero mester a crea un pais pa e Hudiunan cu a bira victima principal di Hitler. E bom atomico a ser introduci pa pone un fin den e guera den Pacifico.

    Nacionnan Uni basa riba dignidad y balor di hende 

    Libertad a haya cuater expresion di parti di aliadonan occidental durante Segundo Guera Mundial. Libertad di Expresion, Libertad di Religion, Libertad di Miedo, Libertad di Necesidad, cu ta nifica cu economia mester cubri necesidad basico humano.

    E cuatro hala di libertad, tabata pa e Aliadonan e motibo pa lanta contra Holocaust, e destruccion di hende den Segundo Guera Mundial y atrobe busca union mundial pa evita ripiticion.

    E acta di establecimento di Nacionnan Uni ta confirma fe den e derechonan fundamental, dignidad y balor di hende. Tur miembro di Nacionnan Uni ta compromete nan mes pa promove respet y cumplimento cu e derechonan y libertad fundamental di hende sin excepcion y distincion.

    Dia Prome di Januari 1942 Presidente Mericano Franklin D. Roosevelt pa prome bes a papia di “Declaracion di Nacionnan Uni”ora 26 nacion a demostra disponibilidad pa sigui bringa contra e paisnan cu a causa Segundo Guera Mundial.

    Un total di 50 pais a reuni na San Francisco pa firma e Acta di Fundacion di Nacionnan Uni a base di proposicionnan di China, Union Sovietico, Merca y Inglatera. Nacionnan Uni a cuminsa existi dia 24 di October 1945.

    Debi na e importancia di Derechonan Humano, despues di holocaust di Hitler, a dicidi di introduci e Declaracion Universal di Derechonan Humano.

    Nacionnan Uni ta laba man den holocaust dor di Nicolas Maduro 

    E palabra Holocaust tin un origen Griego. “Completamente kima” ta traduccion di e palabra cu a ser adopta na Latin y otro idiomanan.

    El a bira expresion pa describi destruccion na escala grandi di hende y el a ser uza entre otro pa e masacre di hende tempo di Hitler.

    Tin tur motibo pa papia di holocaust causa pa Nicolas Maduro, cu a trapa riba principionan basico di Nacionnan Uni.

    Hamas un instancia di Nacionnan Uni por trata di laba man y trata di hustifica loke Maduro a haci na Venezuela.

    Nicolas Maduro a condena pueblo di Venezuela na un dictadura sin frontera. El a trapa riba institutonan oficial di e pais, manera Asamblea Nacional, cu e no ta respeta pasobra nan no ta di acuerdo cu su regimen.

    Economia di e pais rico ta sirbi Nicolas Maduro y su grupo cu ta biba manera rey mientras Venezolanonan mester a bandona nan pais pa pidi limosna, bira prostituta pa haya alimento, remedi y sobrevivencia

    Bachalet a duna Maduro un defensa pa destruccion di Venezuela 

    Teniendo na consideracion e tarea basico di Nacionnan Uni, cu ta defensa di e derechonan humano y e dignidad y balor di hende, mester conclui cu Nacionnan Uni no solamente a faya pa stop e holocaust cu ta tuma luga na Venezuela.

    Despues di e ultimo actonan di Maduro na frontera Venezolano, caminda a mata hende, destrui alimento y remedi cu mundo a reuni pa sostene e pueblo di Venezuela, e dirigente di Derechonan Humano pa Nacionnan Uni no a mustra mundo cu Nicolas Maduro a comete crimen contra humanidad.

    A uza e medidanan cu Merca y Union Europeo a introduci pa evita cu Nicolas Maduro ta sigui abusa di fondonan publico di e pueblo Venezolano, pa yega na un hustificacion pa e desastre economico, financiero y social di Nicolas Maduro.

    Nacionnan Uni a laba man den e holocaust na Venezuela y ta sostene Maduro.

    Ningun momento Bachalet a papia di e motibo legitimo pa introduccion di e medidanan contra Venezuela den man di Nicolas Maduro, cu a trapa contra reglanan di Nacionnan Uni.

    Awe un delegacion di Nacionnan Uni ta bay investiga si Maduro tabata tin rason di destrui cuminda, remedi, salbacion di e pueblo Venezolano cu el a destrui.

    Nacionnan Uni mes a publica cifra di e Miyones di Venezolano cu mester a bandona nan pais.

    Organisacion Mundial di Salud ta adverti contra malesanan cu ta plama na Venezuela pa falta di remedi y cuido medico. No tin electricidad, no tin awa na e pais cu ta sufriendo hopi tempo prome cu paisnan a tuma medida.

    Venezuela ta un di e paisnan rond mundo cu conoce holocaust. Si mira actuacion di Nacionnan Uni por comprende pakico tin tanto refugiado y miseria na mundo.

    Por conclui cu Nacionnan Uni, entre holocaust y holocaust, a perde existencia di existi.

    - Advertisement -

    DUNA COMENTARIO

    Please enter your comment!
    Please enter your name here