Home General Nan a sali satisfecho for di reunion cu Minister Presidente y Minister...

Nan a sali satisfecho for di reunion cu Minister Presidente y Minister di Labor  

41
0
SHARE
- Advertisement -

Sr. Eduard Maduro, presidente:

ORANJESTAD (AAN) — Sindicato SADA a wordo invita pa un reunion cu minister Presidente y e Minister di Labor, unda cu a trata un carta cu sindicatonan a manda na December aña, firma pa algun sindicato, mirando cu nan ta sinti cu e direccion unda cu nan ta bayendo na Aruba, pa locual ta e trato na sindicato, no ta esun miho.

Den entrevista cu Sr. Eduard Maduro, lider di sindicato SADA el a amplia riba e tema aki.

E lider sindical a menciona cu na final di aña pasa, su persona a wordo raporta of intimida pa silencia sindicato SADA, locual el a trece dilanti como presidente di sindicato aki.
Despues di algun dia tabata tin problemanan cu otro sindicatonan, manera SIWA y ABV, cu a confronta problemanan cu nan Gerencia. Pa SADA, esey ta hopi peligroso, ya cu ora cu como sindicato, mester señala iregularidadnan cu ta andando, no por wordo intimida pa no bisa nada.

Den caso di Sr. Maduro, e ta un ambtenaar di Douane y ta forma parti di sindicato, ya cu e sindicato SADA ta solamente pa Ambtenaarnan di Douane, mescos cu polis tin SPA, ABV na hospital, SIWA na WEB. Dus nan tin dos rol y aki ta caminda cu nan no por wordo intimida asina sin mas, cu si bisa algo cu no ta cay na agrado, intimidacion cu menaza ta cay aden.

Esaki ta caminda cu casi dos luna a bin haya e reunion cu e ministernan concerni, unda cu a splica nan, y mustra nan cu nan ta spera cu gobierno mester ta e ehemplo y esun prome yama pa duna ehemplo nan e otro dunadornan di trabao, cu sindicato mester wordo respeta.

Si gobierno mes no ta respeta sindicato, no por spera otro di otro dunadornan di trabao na Aruba, cu mester respeta sindicato. SI gobierno mes no ta respeta sindicato, esey ta un mal ehemplo e ora ey pa e otro dunadornan di trabao.

Por a tuma nota di noticianan cu a sali den prensa, unda cu trahadornan ta wordo retira, of ta wordo menaza, ya cu nan kier busca representacion sindical. Den e mundo moderno aki, unda cu un  trahado kier busca representacion sindical, segun e lider di SADA, e ta wordo menaza door di companianan priva, y pa sindicatonan esey ta inaceptable.

Un persona mester por tin e derecho y libertad di busca representacion sindical, sea ta priva, NV di gobierno of empleado publico. Eynan ta caminda cu sindicatonan a mustra bon cla na Minister Presidente y di Labor, cu gobierno mester duna e ehemplo, nan mester mustra cu nan ta respeta sindicato.

No por ta asina cu un sindicato mester manda ocho carta pa pidi pa un reunion y cu nan no ta haya oido. Pa despues nan bin scucha, cu nan tin atencion.

Y segun SADA, e atencion mester wordo mustra y no solamente di forma verbal. Esey ta e punto principal pa cual sindicatonan a reuni siman pasa.

Ta spera cu gobierno mustra di su parti y ta duna e ehemplo, di duna respet na sindicatonan. Minister di Labor a bay conferencianan di ILO. Y ILO ta esun cu ta respeta sindicatonan rond mundo, y no por bay conferencia di ILO mientras cu na Aruba no tin respet pa sindicato. Pero e comprension a bin di parti di Minister Presidente y Minister di Labor, cu a mustra tur disponibilidad pa bin cu un cambio den esaki. No solamente den e sector priva, pero tambe pa cuminza den e parti gubernamental, unda cu SADA ta spera cu sindicatonan cu tin representacion den e aparato publico, por cuminza wak e cambio di nan respectivo ministernan.

 

- Advertisement -

DUNA COMENTARIO

Please enter your comment!
Please enter your name here