Home General Nos escudo ta un di Aruba su prome simbolonan nacional

Nos escudo ta un di Aruba su prome simbolonan nacional

82
0
SHARE
- Advertisement -

Comision Celebracion Dianan Nacional ta informa

ORANJESTAD (AAN):  Comision Celebracion Dianan Nacional (CCDN) bao auspicio di Ministerio di Cultura ta uni cu Departamento di Cultura Aruba un di su puntonan di prioridad cu ta cultura y educacion di nos cultura Arubano.

Di e seis simbolonan nacional cu ta e Escudo, Himno, Bandera, Idioma Papiamento, Moneda y e Shoco cu ta simbolisa nos identidad como pais Aruba.

Nos prome simbolo nacional ta:

Escudo:

Den corant di 27 di maart 1953 Gobierno a anuncia un concurso pa yega na e escudo di Aruba. Despues ‘Atelier voor Heraldische Kunsten” di Amsterdam, Hulanda a haya e tarea pa crea un diseño basico pa e Escudo.

Dia 15 di November 1955, Gobierno di Teritorio Insular di Aruba a aproba nos escudo oficialmente. Un escudo di un pueblo ta un simbolo di diferente aspecto tipico di e pueblo.

Nos Escudo ta simbolisa:

Den e prome hoki: E mata di Aloë.

E mata di Aloë ta simbolo di nos prome fuente di ingreso, e industria di Aloë.

Den e di dos hoki: E sero di Hooiberg.

Esaki ta simbolisa nos isla cu a sali for di lama. E color berde ta e color di alegria cu nos ta sinti desde nos autodeterminacion y e liñanan manera ola ta simbolisa nos lama.

Den e di tres hoki: Dunamento di man.

E dunamento di man aki ta simbolisa e lasonan di Amistad entre nos pueblo y otro nacion, riba tereno politico, economico y cultural. E color cora ta nifica nos caracter generoso, nos simplesa y balor di trabao pa reforsa e lasonan aki.

Den e di cuater hoki: E wiel…

E wiel ta simbolisa un timon cu ta duna guia na nos industria,cu ta e fuente di bida mas importante di nos isla. E cruz meymey di escudo ta simbolo di debocion y fe. E leon cora riba e escudo ta simbolisa forsa y generosidad. E ramanan di laurel parti abao di escudo ta e simbolo di paz y Amistad.

Siña conoce nos simbolonan nacional y laga nos muchanan y hubentud sera conoci cu nan pa hunto como un solo pueblo nos sinti nos mes orguyoso di ta Arubiano.

Ministerio di Cultura conhuntamente cu Departamento di Cultura y Comision Celebracion Dianan Nacional ta spera di por a comparti un tiki informacion tocante nos simbolonan nacional cuminsando cu nos Escudo di Aruba.

 

- Advertisement -

DUNA COMENTARIO

Please enter your comment!
Please enter your name here