ORANJESTAD (AAN) — Diabierna merdia net cu varios persona tabata cu nan auto na e pump station di Santa Cruz, diripiente por a scucha con algun hoben, a cuminsa discuti cu otro.
Mesora su tras por a mira cu e asunto aki lo escala den un bringamento formal. Den e Tercel cora tabata tin dos hoben y den e otro auto cu tabata para na e pump, un pareha hoben y un baby.
Por a wak con e persona cu tabata cu su pareha a baha for di auto y a pasa man pa su machete y akinan por a mira e reaccion di e otro partido cu no a perde pa gana y a cuminsa busca baranca rond pa defende nan mes contra di esun cu tabata tin e machete den su poder.
Por poco por a wak cu esun cu e machete a alcanza esun otro cu a core drenta auto y cu hopi forsa e persona cu tabata cu e machete a zwaai cu su machete sin piedad y a logra te hasta di kibra e backshield di e Tercel.
Mientrastanto e otro partido a tira baranca y un rato despues mas y mas baranca a cuminsa bula rond. Tabata tin te hasta un cliente cu tabata na pump cu a spanta asina tanto cu esaki a start su auto y bay di e lugar, sin reclama cu un piedra a dal su auto.
Polis a wordo avisa y mesora un cantidad di patruya a yega. Por a tende cu ya caba nan a señala e Tercel cora na Piedra Plat Store, mientras cu tambe por a tende cu un di e partidonan a bay haci entrega di denuncia di maltrato. E motibo di e pelea ainda ta desconoci.
