Prueba cu Citgo no por deshaci di Rusia

    771
    0
    SHARE
    - Advertisement -

    Guaidó y Wever-Croes herederonan di acuerdo peligroso

    *Citgo ta parti di e cadena financiero Comunista

    *Documento legal di Rusia riba su interes den Citgo 

    ORANJESTAD(AAN)–Durante ultimo lunanan DIARIO a lucha pa pueblo di Aruba por ser prepara pa un problema serio cu e pais ta enfrenta si yega na un confrontacion di poder na Venezuela.

    Awe Citgo ta den atencion atrobe debi na e hecho cu Minister Presidente Evelyn Wever-Croes a logra pa e proyecto refineria Aruba ser inclui den e excepcion cu Merca a haci cu Citgo a base di medidanan contra regimen Maduro.

    Awe DIARIO ta presenta prueba cu e tin motibo valido pa mustra cu ainda Aruba no a bandona zona di peliger debi na e interes di Rusia den Citgo y e hecho cu Rusia no ta bandona e interes aki manera el a demostra den Corte na Merca na 2018.

    Presidente Juan Guaidó di Venezuela y Minister Presidente Evelyn Wever-Croes di Aruba ta heredero di un acuerdo sumamente peligroso pa e bienestar di pais Aruba.

    Documentonan oficial di Rosneft 

    Documentonan cu DIARIO ta produci awe ta mustra cu Aruba ta mara na un acuerdo legal entre pais Venezuela y e compania di estado di Rusia, Rosneft cu a haya 49.9 porciento di Citgo como borg pa un debe cu regimen Maduro a haci.

    DIARIO ta informa pueblo a base di berdad y a warda e documentonan aki pa presenta nan awe na Aruba cu asina por mira cu su propio wowo kico ta berdad of no ta berdad den e proyecto di Citgo.

    Citgo a ser cumpra dor di PDVSA na 1986. Na 2010, Presidente Hugo Chavez a dicidi cu e kier a bende Citgo cu el a considera mal negoshi. No a haya compania pa cumpra Citgo pa e prijs di 10 Biyon Dollar y Gobierno di Nicolas Maduro a dicidi di haci Citgo un borg pa debenan grandi cu el a haci riba tereno internacional na 2015.

    Pues ora Gobierno Mike Eman a bay haci negoshi cu Citgo na Merca, tabata den e tempo cu Maduro tabata uza Citgo pa haya placa riba mercado internacional.

    E decision pa no bende Citgo pero uza e compania como borg, a cay na Januari 2015 na Venezuela.

    Acuerdo Aruba cu Maduro sin placa 

    Na 2020 Venezuela mester paga e debenan di 1.5 Biyon y di 1.3 Biyon mientras actualmente mester paga interes tambe.

    Na e momentonan aki, Presidente Juan Guaidó ta busca forma pa paga e sumanan cu mester paga e companianan e luna aki.

    E situacion di Venezuela a sigui dificil y e proyecto di Aruba a ser firma na momento cu placa a caba cu Venezuela atrobe.

    Na November 2016 Nicolas Maduro a acepta un suma grandi den cuadro di un prestamo cu a duna e compania di estado di Rusia, Rosneft 49.9 porciento di Citgo como borg.

    Manera DIARIO corectamente a informa, Rusia nunca a laga su borg cay y na e momento aki, Citgo na Merca ta borg pa e debe cu Venezuela tin cu Rusia.

    DIARIO ta publica documentonan cu Rusia a entrega durante e famoso caso di Crystallex contra Venezuela aña pasa.

    Documentonan Ruso ta confirma berdad 

    E compania cu tabata tin minanan di oro na Venezuela, a ser perhudica dor di Hugo Chavez cu nacionalisacion di economia Venezolano y kier a confisca Citgo.

    Rusia a bin dilanti cu e documento, di cual awe DIARIO ta publica parti pa duna confirmacion cu informacion di DIARIO ta berdad y nada mas cu berdad.

    Tanto Presidente Juan Guaidó como Minister Presidente Evelyn Wever-Croes ta heredero di un contracto cu Aruba a firma cu Nicolas Maduro, a pesar di tur advertencia di expertonan mundial.

    Rusia na e momentonan aki ta practicamente sede di PDVSA, cu por ser considera rehen di Rusia pa e debenan enorme cu Nicolas Maduro a haci na Rusia. Venezuela a bay contra e decision di Guaidó pa  kita Citgo for di PDVSA pero leynan di Merca ta duna Guaidó sosten debi cu Merca a reconoce Guaidó como Presidente, pues representante oficial di Venezuela y Citgo.

    Sinembargo, mester tene cuenta cu Resnoft, compania di estado di Rusia, cu manera e documento aki ta mustra, ta persigui su interesnan rond mundo.

    DIARIO kier evita cu e pueblo di Aruba, cu ya a bira victima di mentiranan politico ora gobierno Mike Eman a introduci e proyecto refineria, no ta bon informa y awe ta presenta pruebanan.

    E documentonan aki ta parti di loke Rosneft di Rusia mes a presenta den Corte na Merca aña pasa pa demostra cu e tin interes financiero legal den Citgo y tambe cu mas compania mester haya sumanan importante di Venezuela prome cu 2020.

    DIARIO lo sigui informa pueblo di Aruba corectamente den cuadro di su responsabilidad periodistico.

    - Advertisement -

    DUNA COMENTARIO

    Please enter your comment!
    Please enter your name here