Home Deporte Seleccion di futbol di Aruba U-17 saliendo weekend pa hunga na Merca

Seleccion di futbol di Aruba U-17 saliendo weekend pa hunga na Merca

445
0
SHARE
— Seleccion ta ocupa cu training casi tur dia ultimo simannan.
- Advertisement -

ORANJESTAD (AAN): E seleccion nacional U17 di Arubaanse Voetbal Bond (AVB) lo biaha diabierna awor dia 15 di Maart pa Merca. E seleccion nacional di Aruba lo competi den e eliminacion mundial di U-17. E campeonato U-17 ta organiza pa e Confederation of North, Central America and Caribbean Association Football (CONCACAF) y ta anticipa cu e lo bira esun mas grandi den historia, debi cu a rediseña e torneo completo.

— Training tur dia ultimo simannan.

E campeonato di mucha homber lo tuma luga den e campus di IMG Academy na Bradenton, Florida. E torneo tin tres eliminacion den dje, di cual e prome rond ta tuma luga entre 16 pa 24 di maart, sigui pa un otro entre 1 pa 9 di april y e ultimo rond di eliminacion ta tuma luga entre 1 y 16 di mei proximo.

Contrario na e formato di antes, cu tabata encera varios wega di eliminacion entre ekiponan di Caribe y Centro America y un campeonato final, e sistema nobo awor ta mas centralisa. Di e forma aki ta sigura cu tur ekipo participante tin un oportunidad di hunga weganan na nivel halto na un solo locacion.

A dividi e 19 ekiponan di e nivel mas abou riba e lista di CONCACAF Men’s Under-17 Rankings, den 4 diferente grupo. Despues di hunga e rondnan, e ganadonan di cada grupo lo avansa pa e “knockout stage” den e competencia final. Asina lo sigui elimina pa drenta den e campeonato final cu rond di 16 ekipo, sigui pa cuarto di final, semifinal y despues e wega final.

E paisnan participando den e Concacaf Men’s Under-17 Championship 2019 ta: Anguilla, Antigua & Barbuda, Aruba, Bahamas, Barbados, Belize, Bermuda, Boneiro, Canada, Cayman Islands, Costa Rica, Corsou, Dominica, Republica Dominicana, El Salvador, Grenada, Guadeloupe, Guatemala, Guyana, Haiti, Honduras, Jamaica, Martinique, Mexico, Montserrat, Nicaragua, Panama, Puerto Rico, St. Kitts & Nevis, St. Martin, St. Vincent and the Grenadines, Surinam, Trinidad & Tobago, Merca y US Virgin Islands.

Ta bon pa bisa cu Mexico a gana e campeonato di Concacaf Men’s Under-17 Championship hunga na Panama na aña 2017. Esey tabata su di 3 titulo di campeon sigui tras di otro y su di 7 en total. Mexico a gana Merca cu score di 5-4 tirando pinalti durante e wega final.

Pa loke ta Aruba, e preparacion ta bayendo hopi bon y hungadonan ta entusiasma y ta presenta na tur training. Na comienso tabatin 47 hungado, pero tiki tiki algun a cay afo y a keda na ultimo cu 20 hungado, asina Leo Garcia, coach di Seleccion Nacional U17, a expresa. Aunke cu ta tiki tempo, asina mes ta traha pa tin un bon structura p’e seleccion.

Pa coach Garcia e pool cu e seleccion di Aruba a cay aden ta mustra un tiki facil, pero tur cos ta e tempo di training. E hungadonan aki tin talento y ta compronde kico e coach kier di nan. Tambe nan a compronde e sistema cu lo bay hunga y ta spera cu nan ta bon prepara pa ora e dia yega pa biaha. E seleccion ta biaha dia 14 di Maart y lo keda te cu 26 di Maart buscando pa pasa p’e siguiente buelta di eliminacion.

- Advertisement -

DUNA COMENTARIO

Please enter your comment!
Please enter your name here