Home General Si minister por haci loke e kier, mester bende compania di estado...

Si minister por haci loke e kier, mester bende compania di estado cu minister

4
0
SHARE
- Advertisement -

E caso Utilities / Hoevertsz:

Siman a cera cu un caso den Corte cu mester dicidi si Utilities N.V. tabata tin rason ora nan a kita Frank Hoevertsz for di su puesto. Hues mester dicidi riba e trabou cu Hoevertsz a haci y tambe si mester papia aki di persecucion politico.

Segun nos sistema democratico, ta na Hues pa haci su trabou. Loke si ta sali na bista atrobe ta, gastonan cu un gobierno por haci via di su companianan of companianan di gobierno. Gastonan cu ta subi prijs cu Pueblo mester paga pa asuntonan basico manera awa y coriente.

E hecho cu politica ta ser treci dilanti den e caso aki mescos cu otro situacionnan cu a ser presenta na Hues, ta habri porta directamente pa e pregunta si den un compania di gobierno, por papia di interes politico.

Pa por haya un bon contesta, mester bolbe den historia di companianan di estado, di gobierno, cu a ser introduci na Aruba pa deshaci di infiltracion politico den departamentonan di importancia directo pa Aruba manera ta e caso di Utilities N.V.

Gobierno ta nombra Comisarionan di Companianan di Gobierno. Segun Ley, gobierno no mester dicidi pa nombramento di Comisarionan a base di e parti politico di gobierno, pero a base di bienestar di e pais. Como resultado e Hunta di Comisarionan di un compania di gobierno mester ta asina liber den nan actuacion, cu nan por opone decisionnan di gobierno cu ta afecta e compania y bienestar di Aruba.

Comisarionan tambe mester stop un nombramento politico pa un compania di estado, cu mester ta someti na control di Parlamento y tambe na instancianan cu Parlamento tin na su disposicion y sigur Algemene Rekenkamer Aruba.

Ora tuma nota di loke a bini dilanti den e caso Hoevertsz versus Gobierno, por comprende cu Hoevertsz por ser considera di tin laso cu AVP y pa tal motibo a ser retira dor di gobierno di MEP.

Esaki ta nifica pues cu den un compania di gobierno, cu a ser introduci pa ta liber di politica, politica por ser hunga. E ta corecto di ambos banda si ta berdad? Hues mester dicidi.

Ki argumento gobierno di MEP ta uza pa retiro di Hoevertsz?  Esaki ta interesante ora mas leu cu Hoevertsz, AVP y MEP,  mira e interes di Utilities N.V., introduci pa sirbi e interes di Pueblo.

A bin dilanti cu Hoevertsz lo no a ser nombra ni a maneha Utilities N.V. segun regla. Abogadonan di Utilities N.V. a bisa cu e compania di estado a ser uza pa financia AVP.  Gastonan enorme cu a ser haci, lo no a tene consideracion cu opinion di Hunta di Comisarionan.

E abogado di Hoevertsz tabata di opinion cu Hoevertsz a actua a base di loke e minister encarga cu Utilities N.V. a dicidi. El a bisa cu e minister y gobierno di AVP tin derecho di dicidi loke a dicidi y e gobierno di MEP tin derecho awor pa cambia e maneho si na su opinion e ta robes.

DIARIO no ta Hues, cu lo dicidi otro luna kico lo pasa. DIARIO ta e matutino di pueblo cu ta puntra su mes si un minister no ta ser controla den su funcion y kico a pasa cu tur e instancianan cu mester lanta para ora un compania di estado ta ser pidi y ta permiti un gobierno uza jet riba lomba di pueblo of sirbi interes politico na cualkier forma.

E compania di estado no ta di politiconan. E ta di pueblo y si e no ta sirbi interes di pueblo y por ser uza como compania priva di politiconan, mester bende cu politiconan pa nan haci nan negoshi.

Pasobra ta pueblo mester paga awa y coriente. Ta pueblo ta bira victima di politica na companianan cu a ser lanta hustamente pa evita dede politico den companianan di gobierno, cu no ta compania di ministernan.

Pa companianan di gobierno haci loke minister kier sin control, nan mester cumpra pues e companianan y bay uza nan como nan propiedad. Mientras ministernan por dicidi cu ta mal uza fondonan di pueblo, nos ta papia di abuso di pueblo cu ta paga pa e compania contra ley.

- Advertisement -

DUNA COMENTARIO

Please enter your comment!
Please enter your name here