Home Salud Ta pidi pashentnan pa controla nan remedi Losartankalium di e fabrica Apote

Ta pidi pashentnan pa controla nan remedi Losartankalium di e fabrica Apote

26
0
SHARE
- Advertisement -

Inspectie Volksgezondheid Aruba: Cierto produccion ta contamina

ORANJESTAD  (AAN) :  Inspectie Volksgezondheid Aruba (IVA) a haya notificacion cu tin un cierto produccion (batch) di e remedi Losartankalium di e fabrica Apotex cu a wordo saca for di mercado na boticanan na Aruba pa motibo di contaminacion cu e producto NMBA.

E remedi Losartankalium ta wordo prescribi pa individuonan cu ta sufri di presion halto y cu problemanan di curason. IVA y tur botica ta pidi pashentnan pa controla nan remedi y pa trece e remedi bek pa nan botica si e ta cay bou di e batch contamina.

E batchnan contamina aki ta contene e stof NMBA cu probablemente ta canceroso. Sinembargo, a haya un cantidad chikito di e producto NMBA aki. Pues, e chens cu en berdad por haya cancer door di bebe e remedi Losartankalium cu ta contamina ta hopi chikito.

Na Aruba e remedi Losartankalium ta obtenibel cu receta di dokter na botica. E importadonan di remedi na Aruba a verifica cu tin batchnan contamina cu a wordo importa na Aruba y a tuma e accionnan necesario pa informa e boticanan debidamente. Seguidamente, e boticanan a kita e batchnan aki for di nan botica.

E Inspectora di Remedi, drs. Roselynn Angela (Boticario) ta urgi esnan cu ta uzando e remedi Losartankalium pa controla e chargenummer riba nan paki di remedi. E chargenummer ta indica e batch di e remedi. Si e chargenummer ta cuadra cu e chargenummer cu tin riba e lista, mester hiba e remedi aki bek na bo botica y eynan lo ricibi mas informacion di bo boticario.

E Inspectora di Remedi ta compronde cu hopi pashent lo tin pregunta y/of preocupacion, pero kier pidi tur pashent pa no stop di bebe nan remedi. Semper consulta cu bo botica. Inspectie Volksgezondheid Aruba lo informa pueblo di cualkier cambio na su debido momento.

E carta di  e compania farmaceutico y e lista completo di e batchnan cu a wordo saca for di mercado por haya riba e website di IVA: www.iva.aw

- Advertisement -

DUNA COMENTARIO

Please enter your comment!
Please enter your name here