Home Hudicial Tres aña di prison exigi pa homber cu a hinca otro cu...

Tres aña di prison exigi pa homber cu a hinca otro cu cuchiu

88
0
SHARE
- Advertisement -

ORANJESTAD (AAN): E homber Dominicano J.N.R. (23) biba na Aruba a scucha Fiscal exigi 3 aña di prison pa a hinca e homber J.G. riba 10 Juni 2018 cu cuchiu of un boter kibra. Fiscal ta considera esaki intento di mata. Tambe J.N.R. ta worde acusa di a hinca of corta e homber S.L. na man cu consecuencia cu S.L. a keda pa un tempo sin por usa su man.

    MALTRATO CU ARMA:

Hues a bisa cu a pidi asistencia di Polis na un lugar caminda dos persona a worde hinca. Na altura di un club nocturno Lekker e maltrato a tuma lugar caminda un homber tabata bati un muher. E homber a core bay Lekker y bolbe cu un otro.

Tur dos tabatin un cuchiu den man. S.L. a worde hinca na man. E otro homber J.G. a bay yuda y tambe a worde herida. Nan a core bay den auto pa hospital. Segun raport medico J.G. sufri corta na man robez, barica y pecho. Mester a haci operacion urgente y despues di 16 dia e por a bay cas.

   DEMANDA DI VICTIMA:

E victima J.G. a presenta y kier a haci un demanda di daño contra J.N.R. di 20 mil Florin. Segun J.G. el a keda cu un cicatriz grandi y ainda e ta sinti dolor. E kier haci otro operacion pa drecha e cicatriz. El a bisa cu e kier bay su pais Colombia pa haci e operacion.

E otro victima S.L. no a presenta pero e partner di dje si. El a bisa Hues cu e tabata tey ora cu e hincamento a sosode. Hues a bisa e dama cu door cu e no tin autorizacion di S.L. e no por bisa nada.

Hues a lesa declaracion di S.L. kende a bisa Polis cu J.G. a kita J.N.R. di bati un muher. E momento ey J.N.R. a bay y bolbe cu un otro homber. J.N.R. kier a hinca J.G. y S.L. a dal’e cu boter riba su man. Despues J.N.R. a ataca S.L., kende a sufri corta severo na man y mester a worde opera.

   SOSPECHOSO DESMENTI:

J.N.R. a bisa Hues cu e tabata tey pero e no a haci nada. E kier a bay mira pero algun persona a bis’e pa hala atras y el a keda para atras. El a bisa cu e tabata den Lekker. Ariba pregunta di Hues el a bisa cu e tabata na Eclipse y despues a sali bay Lekker. Un amigo W. tabata cun’e. El a bisa Hues cu e no a mira W. bringa cu un muher. Segun J.N.R., W. a bay den Lekker y bisa J.N.R. cu tin un problema pafor. W. a bay pafor back y despues J.N.R. a sali pa mira kico tabata pasando. Segun J.N.R. el a mira un grupo ta bringa pero no a mira W. ta bringa. El a bisa Hues cu e no por a yega cerca pa mira. Despues el a bay back Lekker.

Fiscal a pasa riba cu laptop diferente imagennan di camera di seguridad. E sospechoso hunto cu abogado mr. Lejuez tabata mira e imagennan. El a mustra e sospechoso ta cana y tambe e amigo W. Segun Fiscal por mira claramente e sospechoso J.N.R. ta cana cu boter den man.

Hues a mustra cu W. a declara cu e tabata den Eclipse y a topa J.N.R. Despues a bay Lekker. El a bisa cu pafor di Eclipse el a worde maltrata pa tres homber. El a core bay Lekker y a bisa J.N.R. pa bay for di lugar pasobra e tin problema.

Hues a mustra cu tin testigo cu a reconoce J.N.R. como esun cu a hinca J.G. Tin otro testigo a reconoce W. como esun cu tambe a hinca.

   EXIGENCIA DI FISCAL:

Fiscal a bisa cu el a tuma over e caso for di un colega. E mester a studia henter e caso. Segun Fiscal, Lekker a sera y un grupo di homber y muher a sali y a scucha un muher ta grita. Nan a mira un homber tabata bati un muher. J.G. y S.L. a dicidi di bay yuda e muher. Ta W. tabata maltrata e muher. A surgi un pelea y W. a core bay back Lekker y a busca J.N.R. Fiscal a bisa cu e no ta kere W. cu a bisa cu el a bay bisa J.N.R. pa nan bay cas. Riba camera di seguridad por mira W. y J.N.R. core bay unda e pelea a sosode. Por mira cu J.N.R. tabatin 2 boter di cebez den man. J.G. y S.L. a resulta herida. Algun hende ta bisa cu a mira J.N.R. y W. usa boter kibra. J.G. a bisa cu el a worde hinca den man y pecho door di W. y S.L. a bisa cu el a worde hinca y a mira con J.N.R. a hinca J.G. den barica. Un bouncer di Eclipse tambe a bisa cu J.N.R. tambe tabata bringa. E yiu muher di J.G. tambe a declara cu el a mira W. hinca su tata na man y pecho y ora cu J.G. tabata riba suela, J.N.R. a hink’e cu un boter kibra na su barica.

Fiscal a bisa Hues cu W. actualmente ta sera pa un otro caso di tiramento. Ainda Fiscal no a tuma un decision si lo cuminsa un caso penal contra W. pa e caso aki. Fiscal a bisa cu e imagennan di camera di seguridad ta hopi importante den e caso pasobra ey riba por mira e sospechoso y W. El a bisa cu tur dos victima mester a worde opera cu urgencia. Fiscal ta haya cu e demanda di J.G. ta comprendibel y a pidi Hues pa aproba esaki.

Fiscal ta haya cu tur esaki ta mustra cu J.N.R. ta culpable di intento di mata J.G. y maltrato severo riba S.L. Fiscal a exigi 3 aña di prison.

   DEFENSA:

Abogado mr. Lejuez a bisa Hues cu J.N.R. ta desmenti di tabata envolvi den e hincamento. Riba imagennan di camera di seguridad no por mira J.N.R. ta hinca. Abogado ta haya cu e testigonan nan declaracion no ta cuadra. El a mustra cu e victima J.G. mes a bisa e mesun dia di e incidente cu ta un persona a hink’e. Su siguiente dia el a cambia su declaracion cu ta dos persona. Despues e partner di S.L. y yiu muher di J.G. ta bisa cu diferente boter a worde kibra y cu ta J.N.R. a hinca. Na opinion di mr. Lejuez, no tabatin ningun mancha di sanger riba paña di J.N.R., cu ta mustra cu e no a hinca. El a sigui bisa cu despues di a mira video di seguridad, J.G. a cambia su declaracion. El a bisa cu e no sa kende a hinca pero cu tur dos tabatin cuchiu.

Despues S.L. a mira e video y a bisa cu ta J.N.R. a hinca cu cuchiu. Bouncer di otro night club a bisa cu ta 7 Dominicano a core tras di 2 Colombiano y bringa. Ta pesey no ta reconoce J.N.R. como esun cu a hinca. E abogado a remarca cu tabatin contaminacion di testigo pasobra tur e testigonan tabata e mesun dia y ora na warda di Polis pa mira confrontacion di potret. El a mustra cu un di e testigonan promer a declara 11 Juni 2018 cu e no sa kende a hinca. Dia 24 Juni 2018 durante confrontacion e ta bisa cu ta J.N.R. Tambe e abogado a mustra cu S.L. a mustra un otro persona cu a hink’e. E abogado ta haya cu e declaracion di testigonan no ta consistente y como tal mester declara su cliente liber. E abogado a bisa Hues cu riba camera di seguridad no ta mira nada di e hincamento. E abogado a sigui bisa cu J.N.R. tin 7 luna sera caba y ta haya cu esey ta suficiente. El a pidi Hues pa declara e demanda di victima no admisibel. E ta haya cu no a duna splicacion con hopi e gastonan ta pa yega na 20 mil Florin.

Hues despues di a scucha tanto Fiscal como abogado y e sospechoso, a bisa cu e ta bay studia e caso y dentro di algun siman lo por spera sentencia.

 

- Advertisement -

DUNA COMENTARIO

Please enter your comment!
Please enter your name here