Por evita esaki si Arubus prepara di antemano:
ORANJESTAD (AAN) – Diamars mainta banda di 9.20 am ya caba tabata tin un rij di turista wardando pa Arubus cu ta haci e ruta di Eagle y Palm Beach.
Esey ta tur siman ora ta dos pa tres barco crusero ta yega Aruba, solamente cu e pasaheronan cu tin cu yega hotel na tempo, a sinti cu e bus a tarda y cada bez mas turista tabata bin acerca.
Ora e bus a bin para den e linea por a scucha un par di trahador cu tabata yamando nan lugar di trabao pa bisa cu nan lo yega laat, sin cu nan por yuda.
Algo si ta bon conoci. Diamars, Diaranzon y Diahuebs ta dianan cu barconan di turista ta yega nos waf y cu mayoria di turista ta bin na e terminal pa bay lama usando Arubus. Hopi ta subi bus cargando stroller di yiu, y tin biaha hasta rolstoel y tin biaha nan ta stroba otro pasaheronan pa sali sea den Smith Boulevard den cercania di supermercado of otro area di trabao eybanda.
Diamars un bus a sali subi e ruta full yen, y ya caba otro rij tabata formando pa e siguiente bus.
E pregunta ta di con Arubus no ta prepara di antemano y ora e turistanan ta bin para den rij, ya caba tin bus pa nan y pa e pasaheronan local cu ta bay hotel? No ta un sorpresa pa ningun hende cu e rijnan aki ta forma tur siman den dianan specifico. Si e compania ta prepara di prome, e turistanan y localnan no tin cu para tanto rato den higra di solo, y e bus por start bay mas na tempo pa esnan cu tin cu yega trabao.
