Home Economia Afluencia di turismo a crece na 2018 y a genera 3.6 billion...

Afluencia di turismo a crece na 2018 y a genera 3.6 billion florin

225
0
SHARE
- Advertisement -

Segun rapport Banco Central:

ORANJESTAD (AAN) — Minister Dangui Oduber, titular di Salud Publico, Turismo y Deporte, a elabora den conferencia di prensa tocante desaroyo turistico, Aruban Fest cu ta bay reemplaza Carubbian Festival, y a actualiza informacion encuanto Lotto pa Deporte.

TURISMO:

Minister Dangui Oduber a menciona cu e maneho di Ministerio di Turismo specialmente dirigi riba e turista afluente, di calidad, cu ta gasta hopi placa den nos economia, ta dunando su fruto.

E dignatario a subraya cu ora MEP a drenta den gobierno a cambia e target. Anteriormente e enfoke tabata riba e turista cu tin un entrada anual di 100 mil dollar, pero actualmente a cambia e approach di 100 dollar pa 150 mil dollar. Esaki ta e enfoke cu tin aworaki pa asina purba di atrae e grupo meta specifico aki cu ta mas afluente.

E mandatario a splica cu siman pasa Banco Central a emiti su rapport riba e afluencia di turismo pa aña 2018, dunando indicacion di cuanto placa e turista ta laga atras den e economia di Aruba.

Durante 2018 e afluencia di turismo a conoce un aumento di 8.2%. Esaki den cantidad di placa ta nifica un aumento di 270 miyon florin. Den su totalidad e turistanan a genera 3.6 billion florin den Aruba su economia. Esaki ta ilustra y confirma cu e maneho di gobierno pa loke ta industria di turismo ta dunando e resultado desea.

E indicadornan di cifranan di sector hotelero ta similar. Pa loke ta e aña en curso, e “revenue per available room” (RevPAR) di Januari te cu Maart ta 302 dollar. Pues, riba un average un turista ta pagando den e prome lunanan di e aña 302 dollar pa camber, pa anochi. Esey ta un crecemento di 6.6%. Aña pasa esaki tabata na 183 dollar. Esaki ta indica cu ta turistanan di calidad ta biniendo na nos pais, pasobra na momento cu un turista tin e capacidad di paga mas cu 300 dollar pa camber, pa anochi, kiermen cu e ta un bishitante di calidad.

E grado di ocupacion na e momentonan aki, den e prome tres lunanan di aña ta 90%. Nuebe di cada diez camber durante e periodo aki ta ocupa. E grado di ocupacion tambe a conoce un aumento, den comparacion cu aña pasa. E dignatario a subraya cu turismo ta keda e pilar principal y mas importante di Aruba su economia.

Minister Dangui Oduber a gradici tur esnan cu ta labora den e sector di turismo, tur e partnernan di Aruba den turismo, e stakeholders, pasobra pa prome biaha den historia a mira un afluencia di turismo asina grandi cu casi 3.6 billion florin ta keda den Aruba su economia, y un performance hopi positivo di e hotelnan, unda apesar di e gran reto di e di dos mercado cu ta esun Venezolano, e cantidad di turistanan ta keda crece, danki na e mercado Mericano cu a mustra un crecemento di casi 10%. Turismo crusero aña pasa a cera cu 815 mil turista, y e aña aki lo no ta diferente. E meta ta pa mantene e nivel rond di 800 mil turista.

Gobierno ta hopi contento cu e resultadonan aki, y e pronostico pa e aña aki ta mustra cu lo ta un aña sumamente positivo y e retonan ta pa na añanan 2020 y 2021 mantene esaki riba mesun nivel, cu ta uno nunca antes conoci.

- Advertisement -

DUNA COMENTARIO

Please enter your comment!
Please enter your name here