Apelacion di Caso Speeltuin mester habri porta pa un instituto pa moral

    333
    0
    SHARE
    - Advertisement -

    Analisis

    Cu cambionan cu a presenta den nos comunidad, sucesonan cu ta afecta e base moral di nos sociedad a crece cu un rapidez enorme. Pero tin casonan cu hamas nos mester laga bay perdi y cu no solamente mester ta un rato den publicidad.

    Ora Corte den Apelacion trata e caso Speeltuin dialuna, tin dos factor sumamente importante cu ta bini dilanti.

    Otro siman Aruba ta observa Semana Santa, cu pa tradicion ta un siman cu ta pone nos refleha riba e base di moral cu nos ta mantene como pueblo. Semana Santa ta obliga nos dedica atencion na loke ta bon y loke ta malo y dor di condena loke ta malo y aplaudi loke ta bon, percura pa e balansa moral y e macutu di balor di nos pais.

    Semana Santa, ta bisa nos “no mata, no horta, no destrui ni cu hecho ni cu palabra”.  Semana Santa ta carga e lema di gobierno actual cu ta pone hende central y ta expone e lasonan familiar durante entre otro e Caminda di Cruz, un di e tradicionnan mas conoci na Aruba.

    Otro factor importante ta. e aumento den casonan di agresividad di cual hopi tin relacion cu abuso di droga y alcohol pero tambe ta basa riba nos nivel di educacion na cas.

    Un tata den e famia Arubano ta exigi respet di su famia dor di e proteccion cu e ta duna y su defensa na cada miembro di e famia. E tata di famia segun moral di Aruba ta protector di su cas y su famia cu ta duna respet. Un tradicion di Aruba tabata cu un tata Arubano no ta bebe alcohol dilanti su yiunan.

    E palabra “mama” den e vocabulario familiar ta encera aplicacion di e balornan mas halto cu por tin pa asina e duna bon ehempel na su yiunan, proteha nan na tur momento y tur luga y crea pa nan un bida cu ta mas cu “speeltuin”. E bida cu un mama ta crea pa su yiunan na Aruba semper tabata un caminda pa futuro digno.

    Kico a pasa cu nos mentalidad cu awe nos tin un caso speeltuin cu ta duna muestra cu nos pakete di balor y moral a wordo seriamente afecta? Nos por bolbe resumi y sigui resumi pa mañan e resumen bay perdi den e buelta nobo cu ta ser introduci na nos pakete moral.

    Dos mucha, martir di un famia desorienta y un comunidad cu a permiti e caso tuma luga, ta puntra nos kico nos ta bay haci pa evita mas Rishandroh y mas Eugene.

    Un di e casonan mas hororoso di asesinato cu Aruba a conoce, no solamente pa edad di e victimanan, ta haci nos puntra nos mes unda nos moral a keda. Kico a pasa cu nos sentido di comunidad den cual hende ta central.

    Pa hende na Aruba ta central, e balornan y e moral di Aruba mester ta hancra den e comportacion y presentacion di cada persona cu ta forma parti di e comunidad Arubano, cu no por tolera supuesto modernisacion di su cultura, su moral, su sistema di famia, su balornan.

    No por bende Aruba cu modernismo pero mester introduci un instituto caminda casonan manera Speeltuin ta bira parti di ehempel pa loke no mester ta. Den e centro aki ta bay defende nos moral cu introduccion di cursonan oficial pa miembronan nobo di nos comunidad, cu ta mucha pero tambe tur cu ta establece nan mes na Aruba.

    Investigacion profesional mester ser haci di e cambio di mentalidad cu ta expresa su mes hasta den e forma cu nos ta dirigi nos mes na otro cu palabranan y actitudnan cu nunca Aruba a conoce.

    Pa honra dos martir den Semana Santa nos mester gara na nos fe, nos moral religioso, nos ley, Arubianismo den cual e balor di e Arubiano ta hancra.

    Den tur sector mester reahusta Aruba, nos dushi tera cu nos no por entrega na balornan cu ta destrui nos moral.

    - Advertisement -

    DUNA COMENTARIO

    Please enter your comment!
    Please enter your name here