Aruba no ta prepara pa cambio di doño Citgo

    684
    0
    SHARE
    - Advertisement -

    Guaidó a amplia su directornan PDVSA den emergencia

    *Turbulencia politico local mientras mundo ta bati alarma

    *Acuerdo ta hinca Aruba den posicion sumamente serio 

    ORANJESTAD (AAN) — E situacion economico actual di Aruba ta den un situacion sumamente serio. Atrobe DIARIO mester bati alarma grandi pa loke por presenta su mes mientras na Venezuela, diamars e Asamblea Nacional a amplia e cantidad di dirigentenan di PDVSA pa duna Presidente Juan Guaidó oportunidad pa yega na un acuerdo cu financiadonan internacional cu mester ricibi pago di nan debe y interes prome cu fin di april.

    Citgo ta borg pa pago di e debe cu Nicolas Maduro a haci na 2016 ora e tabata uza Citgo pa haya placa riba mercado internacional. E compania tabata ser hinca den un situacion peligroso cu awe ta afecta Aruba, manera a spierta Gabinete Eman for di prome cu contra tur regla a firma e acuerdo cu Citgo.

    Un situacion di turbulencia politico ta ser crea na Aruba, cu ningun momento ta ser prepara pa loke realmente ta menasa su economia ya cu e acuerdo di Citgo no ta regla kico lo pasa si Citgo cambia di doño.

    For di momento cu Gabinete Mike Eman na un forma ilegal, contra ley di Aruba, a tuma riba su mes pa firma e acuerdo cu Citgo, e tabata sa cu Aruba ta ser hinca den un aventura total ya cu tabata conoci cu Maduro tabata uza Citgo como borg pa e haya placa.

    DIARIO ta ilustra aki cu e luna aki si placa no subi mesa, den e situacion di incertidumbre politico actual, Rusia por dicidi cu e ta tuma e 49.9 porciento di accionnan.

    E financiadonan tambe cu lo no kier drenta ningun riesgo por dicidi pa haci Citgo nan propiedad mescos cu Crystallex cu e luna aki mester tende di Hues si e por sigui cu su plan di benta di Citgo.

    Aruba no ta presta e atencion debido na e situacion alarmante cu ta existi y cu ta haci cu e pais no ta prepara pa e problemanan serio cu por presenta.

    Na e momento aki ni Guaidó ni Maduro ta dicidi pa Citgo a menos cu nan tin placa den nan man, loke Guaidó ta trata di haci.

    Diamars Asamblea Nacional di Venezuela a aumenta e cantidad di representantenan di Guaidó den Venezuela. E situacion aki solamente por ser uza na paisnan cu ta reconoce Guaidó y no pa e paisnan cu no ta reconoce Guaidó manera Rusia, cu hasta segun ley Mericano tin derecho di bira doño di Citgo.

    E momento a yega pa pueblo di Aruba ser informa debidamente manera ley ta exigi.

    E acuerdo mester wordo splica na pueblo cu mester comprende kico por pasa cu e pais, cu ta mara na un acuerdo cu no a regla e riesgonan di Aruba manera mester ta.

    E turbulencia politico cu ta ser crea ta contra interes di Aruba, cu mester uni den un consenso nacional manera DIARIO, cu te awor a proba di tin rason a presenta como e solucion nacional pa e pais actua na forma dirigi.

    - Advertisement -

    DUNA COMENTARIO

    Please enter your comment!
    Please enter your name here